పుట్టినరోజు అని..

పండుగలా చేయాలని 

పుడమి కోరుకుంది

ఆకాశపు రెప్పల మాటున

దాచిన విరహ బాధలను

కన్నీటి నీటి వర్షంలా పంపింది

పూల పుప్పొడినంతా

ఒక సంచీలో చేర్చి

పచ్చటి ఆకుల చెట్టు కొమ్మకు కట్టి

ఆ సువాసన స్వాగతం చెబుతుంటే

మెరుపులు తోరణాలుగా చేసి

ఇంధ్ర ధనుస్సును పిలిచి

రంగులు అరువడిగి

కొత్త రంగవల్లులు దిద్ది

కారణం లేని ప్రార్థనకు

ఫలితం వచ్చినట్లు

ఈ లోకం కొత్తగా పుడుతోంది

పుట్టినరోజు అని

ప్రతి రోజూ

ప్రకృతి పండుగ జరుపుతోంది

మార్పు కలిగిన ప్రతి క్షణం

కొత్త జన్మే కదా

మనసు పరిమళించే తత్వం

అందరం అలవర్చుకోరాదా