ప్రేమ పల్లవి

ఊసులెన్నో చెప్పాలి

నా మనసు నీ ముందు విప్పాలి

నీ భాషకు తెలీని విషయాలు

నా స్పర్శతో నీకు నేర్పాలి

బాసలెన్నో చెయ్యాలి

నీ సొగసును కాచుకోవాలి

నా పెదాలకు తెలీని సరదాలు

నీ నవ్వుతో నాకు నేర్పాలి

శాశ్వతం కాదని తెలిసినా ఆశపడాలి

అదేగా జీవితం

అందరూ అంతేగా

తనువూ మనసూ నిన్నే కోరాలి

తప్పేముంది

నువ్వూ నన్నేగా కోరేది

ఈ కాసేపైనా నిజంగా అనుకునేది

అంతగా విడిపోవాల్సి వస్తే

ఎడారి గతం సముద్రమయినట్లు

నా గతం నువ్వు కావాలి

స్వగతంలో చిరంజీవివి కావాలి

నా వలపు వెన్నెల కిరణాలు

నీ ఆశల రేకుల్ని తాకాలి

నా బ్రతుకు బాట చరణాలకు

నువ్వు ప్రేమ పల్లవి కావాలి