నీలోనే

నీ రాతను మార్చుకునే..బలమున్నది నీలోనే..!

ఏ దైవం ఇవ్వలేని..ధనమున్నది నీలోనే..!

సంకల్పం ఉన్న చాలు..ఎదురుచూపు లేకుండా..

చింతలన్ని కాల్చగల్గు..నిప్పున్నది నీలోనే..!

మంత్రతంత్ర మూలాలను..శోధించే పనేంలేదు..

అతీతమౌ శ్వాసపూల..వనమున్నది నీలోనే..!

రానివ్వకు అలసత్వం..కలనైనా నీ మనసుకు.. 

పరమాద్భుత జ్ఞానమొసగు..గురువున్నది నీలోనే..! 

నీ ఊగిసలాటలకిక..స్వస్థి చెప్పి తీరాలోయ్.. 

పరబ్రహ్మ తత్వమనే..వెలుగున్నది నీలోనే..!