పండుగ

కన్నులార నినుచూస్తూ..ఉండటమే పండుగ..! 
నీ వాడని వెన్నెల నే..గ్రోలటమే పండుగ..! 

ఎవరిపిచ్చి వారిదైన..లోకమిదే రమ్యము.. 
ఈ మాటల సాక్షిగాను..వెలగటమే పండుగ..! 

అంటుకున్న అడవి ఎంత..ఆవేదన ముందర.. 
గమనించే సంగతిలో..ఆగటమే పండుగ..! 

ఆశనంటి ఒకతెలియని..ఆవేశం కలదోయ్.. 
మూగవీణ రాగాలను..చూడటమే పండుగ..! 

పరిమళించు కలలతోట..విహారమే తియ్యన.. 
మౌనవాణి గానముగా..సాగటమే పండుగ..! 

వేదాంతము వల్లించే..పనేకదా ప్రయాస.. 
వ్రాయబడని కావ్యముగా..మిగలటమే పండుగ..!