నది చెప్పని కథలు ఎన్నో
నది చెప్పని కథలు ఎన్నో
కలలు మిగిలెను కన్నీళ్లుగా
వయసు కదిలెను వేగిరముగా
మరువక చేసిన పనే నేరమా
మరచిపోని ఆసక్తే దోషమా
ఆతిథ్యం వరమిచ్చింది
ఉత్సుకత గర్భం దాల్చేలా చేసింది
అడగనిదే సంతానం ప్రసాదంలా దొరికింది
నేను కాదని అన్నానే
కానీ దానికి సాక్ష్యం కావాలి కదూ
సమాజం ఏమంటుంది
ఈ ప్రశ్నకు సమాధానం ఎవరిస్తారు
ఎక్కడ దాచేది ఈ పసి కూనను
ఎలా మరచిపోయేది ఈ పసినవ్వును
ఒక మంత్రం కన్న పేగు బాధ తెలిపింది
నన్ను క్షమించే మరో మంత్రం ఎక్కడ దొరుకుతుంది
ఒక్కసారి ఈ లేత పాదాన్ని ముద్దు పెట్టుకుంటాను
కడసారి నా గుండెకు హత్తుకుంటాను
అంతే
అంతకంటే ఇంకేం చేయగలను
కుంతి బాధను తనలో దాచుకుంది నది
నది చెప్పిన ఈ కథ ఆ కర్ణునుది
మరి చెప్పని కర్ణుల కథలు
ఈ ఆర్యావర్తంలో ఎన్నో
వ్యాసుడు వ్రాయని భారతాలు ఇంకెన్నో