కరోనా కాలం

ఒకప్పుడు ప్రపంచం అంటే

అందమైన పచ్చటి పొలాలు

ఆహ్లాదకరమైన ప్రకృతి 

నిర్మలమైన ఆకాశం

నిర్మల మనసు గల మనుషులు

అవధుల్లేని నవ్వులు

హద్దుల్లేని ఆనందాలు

ప్రశాంతాన్నిచ్చే పక్షుల కిలకిలలు

పులకరించే పసినవ్వుల పలుకులు

ఇంతేనా..

ఇలా చెప్పుకుంటూ పోతే ఇంకెన్నో...

మరి అటువంటి అందమైన ప్రకృతి ఇపుడు ఏది

అటువంటి అందమైన ఆనందాలు ఇపుడు ఏవి

అటువంటి నిర్మలమైన మనసులు గల మనుషులు ఇపుడు ఏరి

ఈ ప్రపంచం ఎందుకు ఇపుడు ఇలా ఉంది.. 

అసలు ఈ ప్రపంచం మారిపోవటానికి కారణం ఎవరు

అసలు ఈ కరోనాకు బాధ్యులు ఎవరు? 

మనీషా? మృగమా?? ప్రకృతా???

మనిషి నిర్లక్ష్యమో లేక ప్రకృతి వైపరీత్యమోగానీ కరోనా వైరస్ పుట్టుకొచ్చింది. అయినా, ప్రకృతిలో మార్పులు కలిగితే అందుకు కారణం మనిషే అవుతాడు కనుక ఆ కరోనా వైరస్ పుట్టుకకు కారణం కూడా ముమ్మాటికీ మనిషే. ఆ ఒక చిన్న వైరస్ యావత్తు ప్రపంచాన్నే వణికించింది. ఎంతోమందిని ఆసుపత్రి పాలు చేసింది. వంద కాదు వెయ్యి కాదు కొన్ని లక్షల మంది ప్రాణాలను పొట్టన పెట్టుకుంది. ఎందరో పొట్టకూటికోసం వలస వెళ్లిన వారు సొంత ఊరు రాలేక అక్కడే ఉండలేక నలిగిపోయారు. ఎంతోమంది ఉద్యోగాలు పోయి తిండిలేక ఇంట్లోనే ఉండిపోయారు. బయటికి వస్తే వైరస్ చంపేస్తుంది. ఇంట్లో ఉంటే తింటానికి తిండి లేక ఆకలి చంపేస్తుంది. అయినా కూడా చాలా మంది బ్రతికుంటే చాలు అన్నట్టుగా ఇంట్లోనే ఉండిపోయారు.

నిజం చెప్పాలంటే మనిషికి మనిషి విలువ తెలిసింది ఈ రోజుల్లోనే. మనిషి మానవత్వం బయిట పడింది కూడా ఈ సమయంలోనే. ఎక్కడో గుండె మూలల్లో ఉండిపోయిన ప్రేమలు, ఆప్యాయతలు, జాలి అనే భావాలు బయటికి వచ్చింది కూడా ఈ వైరస్ వల్లే. ఎందరో డాక్టర్లు కుటుంబాలకు దూరంగా ఉండి పగలనక రాత్రనక ఆసుపత్రిలో ఉండి కష్టపడి పనిచేసి చాలామంది ప్రాణాలు నిలబెట్టారు. మరెందరో సమాజం బాగుండాలని, ఎప్పటికప్పుడు పరిసరాలు శుభ్రంగా చేశారు. ఎంతోమంది తమకున్న దానిలోనే పేదలకు మరియు అవసరం ఉన్నవారికి సహాయపడ్డారు. ఎందరో మేమున్నాం అంటూ తోటివారికి ధైర్యానిచ్చారు. మరెందరో జీవితం అంటే తీరిక లేకుండా ఉద్యోగం చేయటం కాదు సొంతవారితో సమయం కేటాయించటం అని అదే నిజమైన జీవితం, అదే నిజమైన ఆనందమని తెలుసుకున్నారు. ఇలా ఒకటా రెండా, మనిషి అంటే ఏమిటో ఎలా ఉండాలో ఆ కరోనా వైరస్ ప్రతి ఒక్కరికి ఒక పెద్ద గుణపాఠం చెప్పింది...

అయినప్పటికీ, ఎందరో ప్రాణాలను బలి తీసుకుంది

ప్రాణం పోతేకాని మనిషికి మనిషి విలువ తెలీదా? తెలియలేదా?? 

అందుకే ఎప్పుడూ కూడా మన చేతలు బాగుండాలి..

మన హృదయం బాగుండాలి..

సాటి మనుషిని ప్రేమించాలి..

ఆ దైవం కరుణిచాలి...