కొంగ వెతికెను నీటికై..

మైళ్ళు నడిచిన తరువాత

ఇక ఓపిక నశించి

కాళ్ళు లాగుతుంటే ఆగిపోయింది

ఎక్కడో దూరంగా గాలి చప్పుడు

గాలొక్కటే కాదు

నీరు కదులుతున్న చప్పుడు

ఏదో రాయి నీటిలోకి వెళుతున్నట్లు

తీరాన్ని తాకే నీటి అలజడి తరంగాలు

కొంగ లేని ఉత్సాహాన్ని తెచ్చిపెట్టుకుని

ముందుకు వెళ్ళింది

ఆహా!

అదిగో నీళ్ళు

ఇది అదృష్టమే అనుకుంది

కొంగ కాళ్ళు తగలగానే

నీరు వెనక్కి వెళ్లినట్లు జరిగింది

ఇంకో అడుగు వేసింది

మళ్లీ అంతే

నీళ్లు వెనక్కి వెళ్ళిపోయి

ఓ చిన్న గుంట మిగిలింది

కొంగ కిందికి చూసేసరికి

ఆఖరి నీటి చుక్క కూడా

అదృశ్యమైంది

మృగతృష్ణ కోసం

పడిన శ్రమకు

కొంగ కన్నీరు కార్చింది

ఆ కన్నీరు భూమిని తాకగానే

సరస్సులో నీళ్ళు మళ్లీ నిండాయి