ఎదురుచూపు

అదొక మనో విలయం

దాటనివ్వదు పెదాల వలయం

గుంభనంగా గుండెన

విస్ఫోటనం ముందు అగ్ని కీలలా

వ్యక్తిత్వ సామర్థ్యం

నిర్ణయించేది నడిచే కాలం

తప్పని అనువుగాని చోట

ఊరే అవమానపు ఊట

కాలికి గుచ్చుకున్న ముల్లుకు

బిగించిన విల్లులా పెదవులు

సంధించిన భావ వ్యక్తీకరణా శరాల్ని

వెనక్కి ఎవరో లాగుతున్నట్టే

తరచి చూస్తే గతించిన రోజుల కమురు

కట్టలు దాటని కన్నీటి చమురుతో

నుసి పట్టిన ప్రమిదలా

చాన్నాళ్లే మిణుకు మిణుకు మంటోంది

గాలి తాకుతుందా

బరువెక్కి ముసిరిన మబ్బుకు

జడివాన కురిసే తెంపును

తలపున వంపని జీవన శైలి

కంఠం దాటని ఆ గరళం

కావాలంటోంది సంఘం కోసం సరళం

తేలికగా తేల్చి పంజరాన్ని విడిచిన పిట్టలా 

తేలికపడాలంటోంది మనసు...

   *గుడ్లదొన సాయి చంద్రశేఖర్*

              *హైదరాబాద్* 

             *9866966001*