దిక్కులు కలిసే చోట !

ఏమైందో ఈరోజు , నీ గురించే నాలో తలపు .

చినుకులా వచ్చి మెరుపులా మాయమైపోయావ్ !

మళ్ళీమళ్ళీ ఎక్కడ చూసినా ,

ఊహల్లో స్వర్గలోకపు ఊర్వశిలా ఊరిస్తూ ,

కలలోనైతే ఓ కల్పనలా కవ్విస్తూ

నా మనసును ఇంకా ఇంకా ఆకర్షిస్తున్నావ్ !

గ్రహాంతరవాసివేమోననే

ఆసక్తినీ నాలో విశేషంగా రేకెత్తిస్తున్నావ్ !

ఎక్కడ ఉంటావో చెప్పవా ప్రియా !

ఎస్సెమ్మెస్సైనా క్లూ తెలిసేలా ఇవ్వవా ?

వివరంగా చాట్ చేస్తే వద్దంటానా ?

వీడియో కాలే నా గుండెను గంటలా తట్టేస్తే

మస్క్ కే మస్కా కొట్టేసి ,

రోదసీబండే ఎక్కేసి రయ్ రయ్యంటూ వచ్చేయనా ,

నీ ముందే ప్రత్యక్షం అయిపోనా !

తూరుపు దిక్కున గార్డెన్ లో

రంగురంగుల గులాబీలను పూయిస్తున్నావా ?

పడమరలో సంధ్యాకాంతులను తిలకిస్తూ ,

ప్రకృతి ఒడిలో పరవశిస్తున్నావా !

లేక , దక్షిణాన చెన్నై నగరంలో

ఇడ్లీ సాంబారునే రుచి చూడాలని విచ్చేస్తున్నావా ?

అహహ్హ యనుచు ఉత్తరాది హిమనీనదాల్లో

జలకన్యవై నాబోటి యాత్రికులనే అలరిస్తున్నావా !

ఏమో ! ఏమేమో !

నాకైతే రంపపుకోతనే మిగులుస్తున్నావు !

కనుల ఎదుటకు రారమ్మన్నా

కిమ్మనక ఆరని మంటనే నాలో రగిలిస్తున్నావు !

పల్స్ రేటును అధికం చేసేస్తున్నావ్ !

బయలుదేరాలనే ఆతృతను అమాంతం పెంచేసి ,

అత్తకూతురిలా సమ్మోహన పరచేసి

నాలో నన్నే నెమ్మది నెమ్మదిగా తుంచేస్తున్నావ్ !

నాలో నిను ఎప్పటికీ దాసుడిలా దాచేయక ,

వచ్చేస్తున్నా ఆలస్యం ఇక చేయక !

దిక్కులు కలిసేచోటే తొలుతగా నిలుచుని

నా చూపుల చుక్కానీతో నలువైపులా చూసేస్తా !

నాలుగు నిమిషాల్లో నీ ఆచూకీ ఇట్టే పట్టేస్తా !

కొరియా భామే స్ట్రీమింగ్ చేస్తూ

ఆంధ్రా వచ్చిందా , నాతో పండుగలో విందు చేస్తోందా ,

సింహాసనంలోని తేనెకళ్ళ మందారమే ఏకంగా

మరల సినిమా షూటింగ్ జరుపుతోందా

మిల్కీ బోయ్కే పోటీ ఇచ్చేస్తోందా అనిపించేస్తా !

దిగ్గజ దర్శకులతో ఔరాయని పలికించేస్తా !