అలా రంగుల కలలా !

నే చూసిన ఆమె ఓ కన్నెకాష్మీరం .

ఆ రాశిలో నేను పుట్టడమో , అది యాదృశ్చికమో

నన్ను చేరిన

చైత్రమాసపు సంధ్యాసమయ సమీరం .

ఉమ్మడిరాష్ట్రంలో ఎదిగి ఒదిగిన

ఇరవైనాలుగేళ్ళ తెలుగు బంగారం .

ఒక్కమాటలో చెప్పాలంటే ,

చూడగానే కనుబొమ్మలు ఎగరేయించే సింగారం .

అందంగా నడిచే అజంతా శిల్పమే .

తెరపై నటించే

తారక తానంటే ఆ పొగడ్త అల్పమే .

పిలుపు పిలుపులో

ఆ వధువు అధరాలలో కమ్మని మధువు .

లాలన పాలన వేళ

హృదయలోగిలిలో నిండురంగుల ఇంద్రధనువు .

ఏమైనా ,

స్వప్నం సాకారమైన అనుభూతి .

కాదు కాదు , ఏకంగా

అదో ఆనందభాష్పాలను తెచ్చే ఖ్యాతి .

నా ప్రశ్నకు ఇన్నాళ్ళకు ఆమెలో సరైన జవాబు .

గడచిన రోజులకు శుభఫలితమై

నా ముందు వెలిగింది అలా దీపావళి మతాబు .

నేనైపోయా అలనాటి ఆగ్రా నవాబు .

రాబోయేతరాల ప్రతిరూపం

మా ఇంట చిరునవ్వుతో అడుగిడగా ,

గుండెగోల ఈలవేసినట్లుగా !

సంభ్రమాశ్చర్యాలలో అందరు , చప్పట్లు మ్రోగగా !!