నువ్వు
నువ్వు
నువ్వు గగనంలో
మెరిసే చక్కని చుక్కవి .
నన్ను చీకటి రాత్రి
అలరించే అమూల్యమైన బొమ్మవి .
నువ్వు ఆకాశంలో
కనిపించే ఇంద్రధనస్సువి .
నన్ను వానకురిసే సమయాన
మురిపించే రంగుల గనివి .
నువ్వు ఉద్యానవనంలో
విరబూసే అందమైన గులాబివి .
నన్ను విహరించే వేళ
మైమరపింపజేసే సుగంధానివి .
నువ్వు అవని కనుమల్లో
బిరబిరా ప్రవహించే జీవనదివి .
నన్ను పసిడిపండే నేలపై
నవ్వులతో రంజింపజేసే జలకన్యవి .
నువ్వు ఇంటిముంగిట్లో
వన్నెలు చిలికే రంగవల్లికవి .
నన్ను ప్రతి శుభోదయాన
కనులకింపుగా ముచ్చటగొలిపే సిరివి .