నువ్వులేని నేను !
నువ్వులేని నేను !
నవ్వుతూ తుళ్ళే నువ్వు నా ఎదుట లేక ,
జాబిలి జాడలేని ఆకాశాన్నయ్యాను .
చక్కని చుక్కలు ఎన్నున్నా ,
మనసెరిగిన నీవు చెంతన లేనపుడు
మెరిసే ఆభరణాలౌతూ ,
హుషారుగా షికారుచేసే మబ్బుల్లా ఉండే
మనఇంటి పరిసరాల్లోని జిలుగులు
వెలవెలబోయి రాత్రంతా నిషాలో మునిగినట్లు ,
తెల్లవారుటకు ఎదురుచూస్తున్నట్లు !
ఒక దీపపు వెలుగులా తెలివిని పంచే నీవు
కంటికి కనబడక , నలుపువైపులా
నిశ్శబ్దం నిరంకుశంగా రాజ్యమేలుతున్నట్లు ,
ఈ వయసులో నేను మళ్ళీ
కాలినడకన బడికి వెళ్ళాలేమో అన్నట్లు !
పంటపొలానికి నీరందించే కాలువలాంటి
నీవు చూపే వెచ్చని ప్రేమకు దూరమై
గమ్యమెరుగని బాటసారినయ్యాను ,
జీవనసంగ్రామంలో నిరాయుధపోరాటం చేసి
భావితరానికి ఓ జ్ఞాపికలా
గోడన వ్రేలాడే చిత్రంలో నీకు తోడునయ్యాను !