ఓ మనసా ! నీకు తెలుసా !

ఓ మనసా ! నీకిది తెలుసా !

నన్నెవరో పిలిచారని ,

నేనాసంగతే తలుస్తూ , నిన్ను నేను మరచానని !

ఆ పిలుపులో మధువులే ఒలికాయని ,

ప్రియరాగాలే నా గుండెలో పలికాయని !

భూమిపై రంగులన్నీ

ఆమెలో తమను చూసుకున్నాయని ,

ఒక్కనిమిషం 

సీతాకోకచిలుకలన్నీ ఆశ్చర్యచకితులై

తమలోతాము గుసగుసలాడాయని !

నవ్వులో గువ్వలు రివ్వున ఎగిరాయని ,

గవ్వలు గలగలా సవ్వడి చేశాయని !

తుమ్మెదలు ఝుమ్ ఝుమ్మని వాలాయని ,

' నేనెక్కడ నేనెక్కడ '

అని నిన్ను నేను ఆతృతగా అడిగానని !!

చెప్పవే మనసా ! నేనామెకు ముందే తెలుసా ?

నన్ను గెలవాలనే అలా చేసిందా !

నాతో జాబిలిలా ఆటలాడిందంటే ,

నీతో స్నేహం అంత విలువైందా !

నన్ను నీకందనివ్వక హాస్యమాడిందే !

మందహాసంతో ప్రేమపూలు కురిపించి

చలికాలంలో వేసవివేడినే నాలో పుట్టించిందే !!