బాల్యమే

అసలుప్రేమకు అద్దమేదో..పట్టవలెనా బాల్యమే..!

చెలిమినిధిగా ఉన్నదేదో..పలుకవలెనా బాల్యమే..!

వానకైనా ఎండకైనా..చిందులాడగ ముచ్చటే.. 

భయంలేశం లేనితరుణం..తెలుపవలెనా బాల్యమే..! 

పరుగుతీసే వాగులాగా..గలంగలగల సందడే..

అబద్దాలకు చోటులేనిది..చాటవలెనా బాల్యమే..!

మనసుగొడవే ఇంతతెలియని..దివ్యలోకం తెలిసెనా..

కన్నులెదుటి స్వర్గమేదో..చెప్పవలెనా బాల్యమే..!

కాల్వగట్టో చెఱువుకట్టో..సంబరాలకు చోటులే..

ఆటపాటల కోట ఏదో..చూపవలెనా బాల్యమే..!

ముద్దులొలికే చిట్టిచేతుల..స్పర్శ ఎంతటి భాగ్యమో.. 

అంతుతెలియని రాగవీణియ..మీటవలెనా బాల్యమే..!