ఆఖరి మజలీ

ప౹౹

ప్రయాణంలో తప్పదుగా మనకూ మజలీ

జీవన యానంలో తెలియదులే ఆ మజలీ |2|

చ౹౹

ఇల్లు లాంటిదే ఈ దేహం తెలుసా జీవుడా

చెల్లుబాటున్నంతవరకూ చేరి ఉండేవాడా ౹2౹

మాయ కమ్మిన లోకంలో మర్మం కానలేవు

లోయలా లోతైనా జీవితం తెలసికొనలేవు ౹ప౹

చ౹౹

వచ్చినపుడు ఈ లోకంలోకి వట్టి చేతులేగ 

పోయేటపుడు పట్టుకుపోయేది సున్నాలేగ ౹2౹

ఎందుకో ఏదో సంపాయించాలని ఆరాటం

అందుకే పగలూ రేయి తెలియని పోరాటం ౹ప౹

చ౹౹

అసలయిన సంచయం పెంచుకొని నిలువు

మసలి మంచితనంతో మనసులూ గెలువు ౹2౹

తొలకరి తొలగి ముదిమితో దేహమనే ఇల్లు

ఆఖరి ఇల్లు వదలు చెప్పి ఈ ఊపిరికి చెల్లు ౹ప౹