ఆకాశంలో సుమబాణం

కదిలినది సఖీ

కాలము క్రొంగొత్త నదీ ప్రవాహమై

ఆటవిడుపు అద్భుత ద్వీపమైన చోట

నీలి రంగు ఆకాశంలో

నువ్వు సుమబాణంలా మెరిసి

వాదనల వేదనలు శిలలై

సప్త స్వరములు జలపాతములై

రెక్కల గుర్రములతో చుక్కలు పోటీ పడు చోట

అంతా నీ పేరే ఉంది

నీ అడుగులు మోపేందుకు ఆలస్యమా

అదుగో అటు చూడు

బంగారు పిచ్చుకల గూళ్ళు

ఇటేమో నెమళ్ళు నాట్యం చేసే పచ్చిక బయళ్ళు

అశాంతి లేని సాంత్వన పొందుతూ

చల్లని గాలి పల్లకీలో తుళ్లుతూ

నిన్ను నిన్నుగా పలకరించే ఆ చోట

ప్రకృతి రమణీయ మాలికగా

వనమున విరిసిన దేవ పుష్పముగా

నువ్వు విహరించి ఆడు

ఎవరి కౌగిల్లోనో ఒదిగితే తప్ప

సుఖం లేదనే వృథా తలపుల నుండి బయటపడు

ఈ ప్రయాణాన్ని ఆస్వాదించడానికి సిద్ధపడు