ସାଧବ ବୋହୂ
ସାଧବ ବୋହୂ
ଶଶି ଭୂଷଣ ମିଶ୍ର
ସାଧବ ବୋହୂ ଲୋ ସାଧବ ବୋହୂ
ବରଷାକୁ ଦେଖି ତୁ ଆସି ଥାଉ
ପିନ୍ଧି ତୋର ନାଲି ପାଟ
ଘାସ ଗାଲିଚାରେ ଚାଲି ଚାଲି ଯାଉ
ଛାଡ଼ିତୁ କାଦୁଅ ବାଟ ।
ନାଲି ପାଟ ତୋର ପସନ୍ଦ ଭାରି
ପିନ୍ଧିଥାଉ କେତେ ଯତନ କରି
କେଉଁଠାରୁ ଥାଉ ଆଣି
ତୋ ଦେହ ମାପରେ କେଉଁ କାରିଗର
ଦେଇଥାଏ ତତେ ବୁଣି ?
ବରଷସାରା ତୁ କେଉଁଠି ଥାଉ
କେହି ଜାଣେନି ତୁ କ’ଣ ଖାଉ
କାହିଁକି ଥାଉ ତୁ ଆସି
ତତେ ଦେଖି ଦେଲେ ମନରେ ଆମର
ଭରି ଯାଇଥାଏ ଖୁସି ।
ମନରେ ପଡ଼ଇ ଦେଖିଲେ ତତେ
ସାଧବ ପୁଅର କଥା ଯେ କେତେ
ବୋଇତ ତାହାର ନେଇ
ଯାଉଥିଲା ଦିନେ ଦୂର ବିଦେଶକୁ
ବେପାର ବଣିଜ ପାଇଁ ।
ନ କହ ପଛକେ କିଛି ତୁ କଥା
ଆସୁଥାଆ ବୁଲି ସହି ତୁ ବଥା
ନ ଯାଇ ଆମକୁ ଭୁଲି
ବେଶି ବେଳ ତୁହି ନ ରହ ପଛକେ
ଦେଖା ଦେଇ ଯାଆ ଚାଲି ।