ଲୁହଟିକେ ଲୋଡ଼ା
ଲୁହଟିକେ ଲୋଡ଼ା
ଆଖିରେ ପାଣି ନାହିଁ
ତଥାପି ତୁମେ ଆସିଲେ
ଦୁଇ ଆଖି ଚିପୁଡ଼ି ଚିପୁଡ଼ି
ଢାଳିଦିବି ଦୁଇ ଟୋପା ଲୁହ
ଓଦା କରିଦେବି
ତୁମ ପ୍ରାଣ ।
ଆଖିରେ ନିଦ ନାହିଁ
ତଥାପି ସ୍ବପ୍ନ ସବୁ
ବୁଢିଆଣୀ ଜାଲ ପରି
ଛନ୍ଦା ଛନ୍ଦି ।
କେମିତି ଦେଖିବି ଅନିଦ୍ରାରେ?
ପରସ୍ପର ସହିତ ଯୋଡି ହୋଇଥିବା
ଏତେ ସ୍ବପ୍ନ ।
ଅନ୍ଧାରରେ ରୂପ କଳ୍ପଟିଏ
ମୋ ଆଖିରେ କରିଛି,
ମନରେ ଗଢିଛି
ଅପଲକେ ଅନାଇଛି
ତୁମ ପଥ,
ଚାଲିବାକୁ ତୁମ ସାଥେ
କିଛି ପାଦ ।
ତାପରେ ଆଖିରେ
ବାଦଲ ଫଟା ବର୍ଷା ପରି
ଲୁହର ଝରଣା ଝରିବ
ଅତଡ଼ା ଖାଇବ
ଦୁଇପତା ଛୁଇଁ ।
ଧୋଇ ହୋଇଯିବ
ଆଖିରେ ଜମିଥିବା ଧୂଳି
କାଚ ପରି ଝଲସିବ ଆଖି
ଆଖି ମୋ ଆଇନା ହୋଇବ ।
ସ୍ବପ୍ନ ସବୁ ମେଳି ହୋଇ
ଆସିବେ ଅତି ସନ୍ତର୍ପଣେ
ପ୍ରଜାପତି ପିଠିରେ ଚଢି ।
ତୁମ ହାତକୁ ମୋ ହାତରେ ଥାପି
ସମ୍ପର୍କର ଚଉହଦିରେ
ପ୍ରେମ ଆଉ ବିଶ୍ୱାସର
ଦୋଳି ଖେଳି
ଆମେ ଦେଖିବା ସ୍ବପ୍ନ
ଆଖିକୁ ଆଖି ମିଳାଇ ।
ଦୁଃଖ,କ୍ଳେଶ,ଗ୍ଲାନି
ଉଭେଇ ଯିବ;
ଆଖିର ଜ୍ୟୋତି
ଅନ୍ଧାରର କାଳିମାକୁ ଚିରି
ସାରା ରାତି ସ୍ବପ୍ନ ଦେଖାଇବ ।