ଲାଇବ୍ରେରୀ
ପ୍ରୋଫାଇଲ୍
ମୁଁ ଆଉ ତୁମେ
ମୁଁ ଆଉ ତୁମେ
ଜୀବନର ସେ ପାହାଚେ
ଖାଲି ଆମ୍ଭେ ଦୁହେଁ
ଦୁଇ ଶରୀର ଗୋଟେ ଆତ୍ମା
ମୁହୂର୍ତ୍ତଗୁଡିକ ଆମ୍ଭର
କିଛି ତୁମେ କହିବ
କିଛି ମୋର ଶୁଣିବ
***
ଜୀବନର ସେ ପାହାଚେ
ଯେବେ ହଜିଯିବ ଅନେକ ଋତୁ
ଦିବା ହେଉ ରାତ୍ରୀ
ଆମେ ଥିବା ସାଥେ
ଯେବେ ଟଳମଳ ହୋଇବ
ଆମ ଦୁହିଁଙ୍କ ଚଲାପଥ
ତୁମେ ମୋର, ମୁଁ ତୁମର
ଥାମି ନେବା ପରସ୍ପରର ହାତ
***
ଜୀବନର ସେ ପାହାଚେ
ଯଦି କେବେ ହଜିଯାଏ ଦୁହିଁଙ୍କ ଶବ୍ଦ
ତୁମେ ମୋତେ, ମୁଁ ତୁମକୁ
ଶୁଣିନେବା ହୃଦୟର ଭାଷାରେ
****
ଜୀବନର ସେ ପାହାଚେ
ଯେବେ ଦର୍ଶିତ ହେବ ରୁକ୍ଷ
ରେଖା ଅନେକ ମୁଖରେ
ଆଦରି ନେବା ଉଭୟେ ପରସ୍ପରର
ସୁନ୍ଦରତାକୁ
****
ଜୀବନର ସେ ପାହାଚେ
ଯେବେ କ୍ଷୀଣ ହୋଇ ଯିବ ଦୃଷ୍ଟିଶକ୍ତି
ତୁମେ ମୋତେ, ମୁଁ ତୁମକୁ
ଖୋଜିନେବା ସେ ନରମ ନିଃଶ୍ୱାସର
ଛୁଆଁରେ
****
ବିତିଯାଇଥିବା ସମୟକୁ ମନେ କରି
କେବେ ଗୁଞ୍ଜିବ ପାପୁଲେ ହସ
ଆଖିରୁ ଗିନାଏ ଲୁହ
ବାଣ୍ଟି ନେବା
ତୁମେ
ମୋର ପଣତ କାନି
ମୁଁ ତୁମ ଖଦି ଅଙ୍ଗବସ୍ତ୍ରେ
****
ପ୍ରତିଟି ସ୍ପନ୍ଦନ ଯେବେ କହିବ
ଏଇଠି କି ଶେଷ
ସମ୍ଭାଳି ନେବ ତୁମେ ମୋତେ
ମୁଁ ତୁମକୁ ସେ ସମୟେ
****
ଜୀବନର ସେ ଶେଷ ପାହାଚେ
ଝୋଟି ସଦୃଶ ଆମର ପ୍ରତ୍ୟେକଟି
ପାଦଚିହ୍ନ କହୁଥିବ
ଆମର ପ୍ରତିଟି ସ୍ମୃତି
ଚିରନ୍ତନ ଏହି ପ୍ରେମ
ଦୁଇଟି ପବିତ୍ର ଆତ୍ମାର
ରହିଥିଲା
ଯୁଗେ ଯୁଗେ
ରହିଥିବ
ମୁଁ ତୁମ ସାଥେ
ତୁମେ ମୋ ସାଥେ
