ପଦଟିଏ ତୋ ନାଁରେ ପ୍ରିୟା ୩୯

ବିଶ୍ଵାସ ହେଉନି ତୁମରି ଆଖିରେ

ମୋ ପାଇଁ ପ୍ରତୀକ୍ଷା ଥିଲା

ବିଶ୍ଵାସ ହେଉନି ତୁମରି ଓଠରେ

ମୋ ନାମ କେବଳ ଥିଲା ।

ବିଶ୍ଵାସ ହେଉନି ତୁମରି ହୃଦୟେ

ମୋ ପାଇଁ ଘରଟେ ଥିଲା

ବିଶ୍ଵାସ ହେଉନି ତୁମ ଚପଳତା

ମୋ ପାଇଁ ଚମକୁ ଥିଲା ।

ବିଶ୍ଵାସ ହେଉନି ତୁମରି ପସନ୍ଦ

ମୋହରି କବିତା ଥିଲା

ବିଶ୍ଵାସ ହେଉନି ମୋହରି ପ୍ରଶଂସା

ତୁମ ଓଠ ଗାଉଥିଲା ।

ବିଶ୍ଵାସ ହେଉନି ମୋର ସରଳତା

ତୁମରି ବିଶ୍ଵାସ ଥିଲା

ବିଶ୍ଵାସ ହେଉନି ମୋର ମଉନତା

(ତୁମକୁ) କେତେ କଥା କହିଥିଲା ।

 

ବିଶ୍ଵାସ ହେଉନି ତୁମରି ଓଢଣା

ମୋ ଘରେ ଶୋଭା ପାଇଲା

ବିଶ୍ଵାସ ହେଉନି ତୁମରି ପାଉଁଜି

ମୋ ପାଇଁ ସଙ୍ଗୀତ ହେଲା ।