ସାଥୀ

ମଥା ଛୁଇଁ ଦିନେ ଦେଇଥିଲ କଥା 

ହାଟ ସଉଦାରେ ହୋଇବ ସାଥୀ

ଚାଲିନେ ପାହୁଣ୍ଡେ ଜୀବନର ବାଟ

ଏତିକିରେ ତୁମେ ପଡ଼ିଲ ଥକି ?

କହିଥିଲ ସାଥୀ ଆନ ପରି ନୁହଁ 

ବଦଳି ଯିବିନି ସମୟ ସହ

ଆଜି ସ୍ମୃତି ତୁଠେ ବସି ମୁଁ ଭାଳୁଛି 

ଥିଲା କି' ଫିକର ସତ'ତ ନୁହଁ ?

ଅତୀତେ ବିନ୍ଦୁଏ ଲୋତକ ଝରିଲେ 

କହି ଯାଉଥିଲ ଗୁଡ଼ାଏ କଥା

ଆଜି ଏ ଲୁହରେ "କାବେରୀ" ଉଛୁଳେ 

ଆଉ କି' ହଉନି ହୃଦୟ ବ୍ୟଥା ?

ବାଧିକାରେ କେବେ ପଡ଼ି ଯାଉଥିଲେ 

ଦେଖିଛି ଚାତକ ମୋହରି ଘରେ

ଆଜି ମୋ ପିଣ୍ଡରୁ ପରାଣ ଛାଡିଲା 

ରହିଲ କିପରି ଯୋଜନ ଦୂରେ ?

ଆରେ !

ନାହିଁ ଆଉ ମନ ନାହିଁ ସେ ମଣିଷ 

ନାହିଁ ସେ ସମୟ ବିତିଛି ସବୁ

ଶିଳାପରେ ମଥା ଯେତେ ମୁଁ ପିଟିଲି

କେବଳ ପାଇଲି ମଥାରେ ଆବୁ