ଝଡ ଦିଅ ରଚେଇ

ଚୁପିଚୁପି କଥାକୁହ

ଯେବେ ଆଖି ନଚେଇ ,

ରାଣ ଅଛି,ଛାତି ତଳେ

ଝଡ଼ ଦିଅ ରଚେଇ ।

ଛୋଟ ପିଲା ଭଳି ଯେବେ

ହୁଅ ତୁମେ ଫୁଲେଇ ,

କେତେ ବାଗେ ଛଇଳା ଗୋ

ମନ ନିଅ ଭୁଲେଇ ।

ଲୋଟଣୀ ପାରାଟି ଭଳି

ଘୁରିଯାଅ ଯେବେ ଗୋ,

ଲାସ୍ୟମୟୀ କେତେ ଛନ୍ଦ

ତୋଳିଯାଅ ତେବେ ଗୋ ।

କଟି ଦୋହଲାଇ ଯେବେ

ଛାଟି ଦିଅ କବରୀ ,

ଜୁଡାର ରଜନୀଗନ୍ଧା

ବାସ ଯାଏ ବିତରି ।

କେଡ଼େ ବାଗେ ବିହି ସତେ

ଗଢ଼ିଅଛି ତୁମକୁ ,

କଥା କହିଦେଲେ ମୋତି

ଝରିପଡ଼େ ମନକୁ ।

ମଧୁଛନ୍ଦା,ମାନିନୀ ଗୋ

ମୋ କଥା କି ରଖିବ ,

ହଅଁ କଲେ ,ଲେଖନୀ ମୋ

ତୁମ କଥା ଲେଖିବ ।

ବି ନିରୁପମା

ମାମୁରିଆ, ଛେଣ୍ଡିପଦା,ଅନୁଗୋଳ।