ସଅଳ ସଅଳ ଚାଲ
ସଅଳ ସଅଳ ଚାଲ
ଡେରି କରନାହିଁ ମୋ ସାଥିରେ ପିଲେ
ସଅଳ ସଅଳ ଚାଲ ,
ହାଟକୁ ଯାଇ ମୁଁ ପରିବା ବିକିବି
କରି ସେଠି ମୂଲ-ଚାଲ ।
ଗରାଖ ମାନଙ୍କୁ ମନାଇ ପାରିଲେ
କିଣି ନେବେ ଫଳ-ମୂଳ,
ପଇସା ଗଣ୍ଡାକ ହାତକୁ ଆସିଲେ
ପାଇବି ଶ୍ରମର ଫଳ ।
କେତେ ଜାତି ପନିପରିବା ଲଗାଇ
ଯତନ ନେଉଛି ତା'ର ,
ହାଟରେ ତାହାକୁ ବିକିରି କରିଲେ
ଚାଲିବ ଆମରି ଘର ।
ତୁମଲାଗି ପୁଣି ଖେଳଣା,ପୋଷାକ
ଆଣିଦେବି ମୁହିଁ କିଣି ,
ଖାଇପିଇ ତୁମେ ଇସ୍କୁଲକୁ ଯିବ
ଏଣେତେଣେ ବୁଲିବନି ।
ଆସ ଏବେ ତୁମେ ମାମୁନି,ବାବୁନୁ
ପାଠ ପଢ଼ିବାକୁ ଯିବ ,
ହାଟ ସାରି ମୁହିଁ ସଅଳ ଫେରିବି
ଆସିଲେ ରୋଷେଇ ହେବ ।
ବି. ନିରୁପମା
ମାମୁରିଆ, ଛେଣ୍ଡିପଦା,ଅନୁଗୋଳ ।