लेक चालली सासरला...

लेक चालली सासरला...

मुलगी असते परक्याचं धन

तिला कशी आपली म्हणू ?

माय-बाप शिंपल्याचं कोंदण

लेक लाडकी मोती जणू... ॥१॥

माझी लाडाची छकुली

कधी मोठी झाली कळेना ?

लेकीचा पाय उंबरठ्यावरून

सासरच्या दिशेने वळेना... ॥२॥

तिच्या सुखी संसारासाठी

माय - बापाचा आशीर्वाद

नांदो मुलगी आनंदाने

होऊ नये भांडण, वाद... ॥३॥

लेक चालली सासरला

फिरणार नाही माघारी

रडतात आई-वडील

रडती सारे शेजारी... ॥४॥

लेक जातांना सासरी

डोळ्यांतून तरळला भाव

बापाच्या डोळ्यांत नेहमी

दिसतो स्वप्नांचा गाव... ॥५॥