Click Here. Romance Combo up for Grabs to Read while it Rains!
Click Here. Romance Combo up for Grabs to Read while it Rains!

Sanjaya Ananda Kumar Tripathy

Comedy


4.7  

Sanjaya Ananda Kumar Tripathy

Comedy


ସ୍ମାର୍ଟ ସିଟିର ଅକୁହା କଥା

ସ୍ମାର୍ଟ ସିଟିର ଅକୁହା କଥା

4 mins 228 4 mins 228

ପ୍ରକୃତିର ଡାକରାକୁ କିଏ ବା ଅଟକାଇପାରିବ । ସେ ଯିଏ ହେଉନା କାହିଁକି ପ୍ରକୃତି ସାମନାରେ ହାରମାନିବାକୁ ହେବ । ହୁଏତ କିଛି ସମୟ ପାଇଁ ଅଟକାଇ ଦିଆଯାଇପାରେ । ଏଠି ପ୍ରକୃତିର ଡାକରାମାନେ ମୁଁ ବନ୍ୟା, ବାତ୍ୟା, ଲଘୁଚାପ କି ଭୂମିକମ୍ପ ବିଷୟରେ ଆଲୋଚନା କରୁନାହିଁ । ବାକି ଯେଉଁ ଡାକରା କଥା କହୁଛି ଆପଣମାନେ ସମସ୍ତେ ଅଙ୍ଗେ ନିଭାଇଛନ୍ତି । ଊଣାଅଧିକେ ପରିସ୍ଥିତି ସମ୍ଭାଳି ନେଇଥିଲେ ମଧ୍ୟ ଏହା କେତେ ଅସମ୍ଭାଳ ଆପଣଙ୍କୁ ବୁଝାଇବା ଜରୁରୀ ନୁହେଁ ବୋଲି ମୁଁ ମନେକରେ ।

ଯେଉଁମାନେ ଏଇ ପୃଥିବୀରେ ରାଜୁତି କରୁଛନ୍ତି, ତଥାକଥିତ ଦେଶସେବୀ ବୋଲି ନିଜକୁ ପରିଚୟ ଦେଇଛନ୍ତି, ସେମାନେ ଏଇ ପ୍ରକୃତିର ଡାକରାକୁ ନିୟନ୍ତ୍ରଣ କରିବା ପାଇଁ ମଧ୍ୟ ଭାଷଣ ଦିଅନ୍ତି । ତାଙ୍କ ମତରେ ସବୁ ଜିନିଷ ନିଜ ହାତ ମୁଠାରେ ରଖିହେବ କିନ୍ତୁ ନିଜ ଗାଦି ରଖିବାକୁ ଏମାନେ ଅସମର୍ଥ । ବେଳେବେଳେ ଦୂରଦୃଷ୍ଟିର ଅଭାବରୁ ଏଇମିତି ଆଦେଶ ଦେଇଥାନ୍ତି କିନ୍ତୁ ସେମାନେ ନିଜେ ହିଁ ପାଳନ କରିବାରେ ଅସମର୍ଥ ହୋଇଥାନ୍ତି ।

ଗାଁରୁ ସହର ସୃଷ୍ଟି ବୋଲି ସମସ୍ତେ ଜାଣନ୍ତି । ଯେଉଁଠି ବି ସହର ହୋଇଛି ସେଠି ପୂର୍ବରୁ ନିଶ୍ଚୟ ଗାଁଟିଏ ଥିଲା । ଏମିତି ସହର ବଢ଼ିଲା ପରେ ସହର ଭିତରେ ଥିବା ଗାଁର ଅସ୍ତିତ୍ୱ ହଜିଗଲା । ପୁରୁଣା ଗାଁର ଲୋକଙ୍କୁ ସହରୀ ସହରୀ ଲାଗିଲା । ସହରଟା ଏତେ ପୁରୁଣା ହୋଇ ନଥିବାରୁ ଲୋକଙ୍କ ଆଚରଣ ବି ବଦଳି ନଥିଲା । କିନ୍ତୁ ଜନସଂଖ୍ୟା ବଢ଼ିଯାଇଥିବାରୁ ସରକାର ବିଶେଷଜ୍ଞ କମିଟି ବସାଇ ତାକୁ ସ୍ମାର୍ଟ ସିଟିର ମାନ୍ୟତା ଦେଲେ ଓ କେତେକ ନିୟମ କାନୁନରେ ପରିବର୍ତ୍ତନ ଆଣିବା ପାଇଁ ସ୍ଥିର କଲେ । ସଂପୃକ୍ତ ବିଭାଗର ମନ୍ତ୍ରୀ, ସଚିବ ଏଥିପାଇଁ ବିଦେଶର ବଡ଼ ବଡ଼ ସହର ଗସ୍ତ କରିବା ସହିତ ଦେଶର ବିଭିନ୍ନ ସହର ମଧ୍ୟ ଗସ୍ତ କଲେ । ଏଇ ଆଳରେ ବୁଲିବା ମଧ୍ୟ ହୋଇଗଲା । ଶେଷରେ କେତେକ ନିୟମ କାନୁନ ପରିବର୍ତ୍ତନ ପାଇଁ ପ୍ରସ୍ତାବ ମଧ୍ୟ ଗୃହୀତ ହେଲା । ଏଥିପାଇଁ ତର୍ଜମା ହେଲାପରେ ବିଧାନସଭାରେ ମଧ୍ୟ ଗୃହୀତ କରାଇଲେ ଓ ଏହା ଆଇନରେ ମଧ୍ୟ ପରିଣତ ହୋଇଗଲା ।

ଗାଁଟା ସହର ହେଲା । ଗୋଟାଏ ରାସ୍ତା ଥିଲା, ଏହା ଦୁଇଭାଗ ହୋଇଗଲା । ଏକଥା ସହର ଭିତରେ ଥିବା ଗାଁଲୋକ ସବୁ ଜାଣିଲେ । ଟ୍ରାଫିକ୍ ନିୟମ ବି ବଦଳିଗଲା ଜାଣିଲେ, ଅବଶ୍ୟ ପ୍ରଥମେ ପ୍ରଥମେ ହଇରାଣ ହେଲେ । ଏମିତି ଗାଁରୁ ଜଣେ ଭଦ୍ରବ୍ୟକ୍ତି ରାଜଧାନୀକୁ ଆସିଲେ । ବସ୍‌ଷ୍ଟାଣ୍ଡ୍‌ରେ ଓହ୍ଲାଉ ଓହ୍ଲାଉ ପ୍ରଥମ ମାନେ ଏକ କାମ କରିବା ପାଇଁ ଡାକରା ଆସିଲା । ଆଖିରେ ପଡିଗଲା ସୁଲଭ ଶୌଚାଳୟ । ହେଲେ ତା ଦୁଆରକୁ ଯାଉ ଯାଉ ସୁଗନ୍ଧିତ ବାସନାରେ ତାଙ୍କ ମୁଣ୍ଡ ଗୋଳମାଳ ହୋଇଗଲା । ବାଧ୍ୟ ହୋଇ ଫେରି ଆସିଲେ । ଗାଁରେ କେତେ ସଫାସୁତୁରା, ଗନ୍ଧ ନାହିଁ କି ବାସନା ନାହିଁ । ମନେ ମନେ ଚିନ୍ତାକଲେ, ଜରୁରୀ ନାହିଁ ପରେ ଦେଖିବା । ଆଗକୁ ମାଡିଗଲେ ଓ ଅଟୋରେ ବସିଲେ । ଅଟୋ ନେଇ ପୁରୁଣା ବସ୍‌ଷ୍ଟାଣ୍ଡ ପାଖରେ ଛାଡିଦେଲା । ଏତେବେଳକୁ ଅବସ୍ଥା ଅସମ୍ଭାଳ ହେଲାଣି । ଏପଟ ସେପଟ ଅନାଉ ଅନାଉ ଦେଖିଲେ ଗୋଟେ ଜାଗାରେ ଲେଖା ହୋଇଛି ଏଠାରେ ପରିସ୍ରା କରନ୍ତୁ ସେଠିକି ଯାଉଯାଉ ନାକକୁ ଚିପିବା ପାଇଁ ହାତ ଆପେ ଆପେ ଉଠିଗଲା । ଆଉ ଏପଟ ସେପଟ ନ ଦେଖି ଖଲାସ କରିବାରେ ଲାଗିଲେ । କେଉଁଠି ଥିଲେ କେଜାଣି ପୋଲିସ୍ ଜଣେ ଆସି ପହଂଚିଗଲେ । ବନ୍ଦ କର । ବନ୍ଦ କର । ହେଲେ ଏ ଲୋକ ଆଉ ପରିସ୍ରା ବନ୍ଦ କରିବାର ଅବସ୍ଥାରେ ନାହିଁ କାରଣ ଏହା କେତେ କଷ୍ଟକର ଆପଣ ଜାଣିଛନ୍ତି । ଏଣେ ପୋଲିସ୍ ଭାଇ ବି ଡ୍ୟୁଟି କରିବା ପାଇଁ ତତ୍ପର । ଏମିତି ଟଣାଟଣି ଭିତରେ ଭଦ୍ରବ୍ୟକ୍ତି କାମ ବଢ଼ାଇଦେଲେ ।

ତା’ପରେ ସମସ୍ୟା ଆରମ୍ଭ ହୋଇଗଲା । ପୋଲିସ୍ ବାବୁ କହିଲେ ତୁମେ କ’ଣ ଜାଣିନ ସର୍ବସାଧାରଣ ସ୍ଥାନ / ରାସ୍ତା କଡରେ ପରିସ୍ରା କରିବା ମନା । ଏଥିପାଇଁ ତୁମକୁ ଜୋରିମାନା ଦେବାକୁ ପଡିବ । ଭଦ୍ରବ୍ୟକ୍ତି ଚିଡ଼ି ଉଠିଲେ । କହିଲେ ମୁଁ କ’ଣ ମୂର୍ଖ ହୋଇଛି । ପାଠ ପଢ଼ିଛି । ଏଇ ଦେଖନ୍ତୁ ସେଠି କଣ ଲେଖା ହୋଇଛି ଏଠାରେ ପରିସ୍ରା କରନ୍ତୁ । ପୋଲିସ୍ ବି ଦେଖି ଅବାକ । କହିବା ବାହୁଲ୍ୟ ଏଠାରେ ପରିସ୍ରା କରନ୍ତୁ ନାହିଁ”ରୁ “ନାହିଁ” ଶବ୍ଦଟାକୁ କିଏ ଜଣେ ଘଷି କରି ଲିଭେଇ ଦେଇଛି । ପୋଲିସ୍ ବାବୁ ଦେଖିଲେ ହେଲେ ବୁଝିବାକୁ ନାରାଜ । କହିଲେ - ଲେଖାରେ କ’ଣ ଅଛି ? ସରକାର ଆଇନ କରିଛନ୍ତି ମାନେ ଜୋରିମାନା ଦେବାକୁ ପଡ଼ିବ । ଆପଣ ଏସବୁ ଜାଣି ଜାଣି କରିଛନ୍ତି ବୋଲି ବିଚାର କରାଯିବ ।

ଭଦ୍ରବ୍ୟକ୍ତି ଜଣକ ଅଡୁଆ ପରିସ୍ଥିତିରେ ପଡ଼ିଗଲେ ବାଧ୍ୟ ହୋଇ ସାଲିସ୍ କଲେ । ପୋଲିସ୍ ଭାଇ କଥା ବୁଝିବା ପାଇଁ କହିଲେ । ସେ ବି ହଁ ଭରିଲେ । କହିଲେ ଏଇ ଆଗରେ ଯୋଉ ଟ୍ରଲିରେ ଇଡ଼ଲି, ବରା ବିକ୍ରି କରୁଛି ତା ପାଖକୁ ଯାଅ ସେ ବୁଝାଇଦେବ । ସୁନାପିଲା ଭଳି ଭଦ୍ରବ୍ୟକ୍ତି ଜଣକ ଇଡ଼ିଲି ବିକୁଥିବା ଲୋକ ପାଖରେ ପହଂଚି କଥା ବୁଝିଗଲେ ।

ନିର୍ଦ୍ଧାରିତ ଅଫିସ୍‌ରେ କାମ ପାଇଁ ପହଂଚିଗଲେ । ଟଙ୍କାରେ ଖଣ୍ଡିଏ, ଟଙ୍କାରେ ଖଣ୍ଡିଏ ଡାକ ନେଉଥିବା ବିକାଳୀ ଠାରୁ ସକାଳର ୫ ଟଙ୍କିଆ ଖବର କାଗଜ ଖଣ୍ଡେ ସଂଗ୍ରହ କଲେ । ଆତ୍ମହତ୍ୟା କରୁଥିବା ମହିଳାଙ୍କୁ ମହାନଦୀରୁ ଉଦ୍ଧାର ଖବର ଫଟୋ ସହିତ, ଚପଲ ହଜିଛି ଖବର ବକ୍ସ ମଧ୍ୟରେ ବାହାରିଥିବା ବେଳେ “ସ୍ମାର୍ଟ ସିଟିରେ ନିଷ୍କ୍ରିୟ ପ୍ରଶାସନ ” ଖବର ମଧ୍ୟ ପ୍ରଥମ ପୃଷ୍ଠାରେ ସ୍ଥାନ ପାଇଥିଲା । ନଗଦ ପୋଲିସ୍ ଠାରୁ ହଇରାଣ ହୋଇଥିବା ବ୍ୟକ୍ତି ଏଇ ଖବର ଆଗ ପଢ଼ିବା ସ୍ୱାଭାବିକ । ଖବରରେ ରାଜଧାନୀରେ କେମିତି ସ୍କୁଲରୁ ପିଲା ଛାଡି ଫେରୁଥିବା ମହିଳାଙ୍କ ସୁନାଚେନ୍ ଲୁଟି, ଥାନା ପାଖରେ ଦେଶୀମଦ ବିକ୍ରୀ ଇତ୍ୟାଦି ଖବର ଅନ୍ତର୍ଭୁକ୍ତ ଥିଲା । ଏସବୁ ପଢ଼ି ଭଦ୍ରବ୍ୟକ୍ତିଙ୍କର ରାଗ ପଞ୍ଚମକୁ ପଡ଼ିଗଲା । ସାଂଗେ ସାଂଗେ ସେଇଠି କାଗଜ କାଢ଼ି, ସଂପାଦକଙ୍କୁ ପତ୍ର ଲେଖିଲେ ।

ପ୍ରଶାସନ ନିଷ୍କ୍ରିୟ ନୁହେଁ- ସବୁବେଳେ ସଜାଗ ଅଛି, ଯେଉଁଥିପାଇଁ ସହରର ଟ୍ରାଫିକ୍ ଆଇନ୍ ଶୃଙ୍ଖଳା ରାସ୍ତା ଘାଟ ଠିକ୍ ଅଛି । ଆପଣ ଯଦି ବିଶ୍ୱାସ କରୁନାହାନ୍ତି ତାହେଲେ ବିନା ହେଲ୍‌ମେଟ୍‌ରେ ଗାଡ଼ି ଚଲାନ୍ତୁ, ରାସ୍ତା କଡ଼ରେ ପରିସ୍ରା କରନ୍ତୁ, ଟ୍ରାଫିକ୍ ଛକ ପାଖରେ ଠେଲା ଦୋକାନୀଠୁ ବରା, ଚପ୍ କିମ୍ବା ଇଡ୍‌ଲି ଖାଆନ୍ତୁ, ଜାଣିଯିବେ । ଅଧମ ରାଜଧାନୀ ଆସି ସ୍ୱଚକ୍ଷୁରେ ଦେଖିଛି । ତେଣୁ ଆପଣ ଆସନ୍ତା କାଲି ଏଥିପାଇଁ ଦୁଃଖ ପ୍ରକାଶ ପ୍ରଥମ ପୃଷ୍ଠାରେ ସ୍ଥାନ ନ ହେଲେ ଶେଷପୃଷ୍ଠା ଶେଷ ସ୍ତମ୍ଭରେ ପ୍ରକାଶ କରନ୍ତୁ ।ଚଟାପଟ୍ ଲଫାଫାଟିଏ କିଣି ଅଫିସ୍ ସାମ୍‌ନାରେ ଥିବା ଚିଠି ବାକ୍ସରେ ଗଳେଇଦେଲେ ଓ କାମପାଇଁ ଲିଫ୍ଟ ଆଡ଼କୁ ମାଡିଗଲେ ।

                                                       


Rate this content
Log in

More oriya story from Sanjaya Ananda Kumar Tripathy

Similar oriya story from Comedy