ଉତ୍ତର ପାଇ ନଥିବା ପ୍ରଶ୍ନ
ଉତ୍ତର ପାଇ ନଥିବା ପ୍ରଶ୍ନ
ଖୋଜି ମୁଁ ଚାଲିଛି ଅନ୍ତରେ ବାହାରେ
ଚିନ୍ତେ ଅନୁକ୍ଷଣ ବସି ଏକାନ୍ତେ,
ଦେଖଇ ନିରେଖି ଦୂରେ ଚଉପାଶେ
ପରିଧି ପ୍ରଶ୍ନିଳ ବ୍ୟାପ୍ତି ଦିଗନ୍ତେ ।
ପଚାରି ଚାଲିଛି ପ୍ରଶ୍ନ ମୁଁ ନିଜକୁ
ଖୋଜି ପାଉନାହିଁ ଉତ୍ତର ତାର ,
ଦର୍ଶନ ସାହିତ୍ଯ ବିଜ୍ଞାନ ଜ୍ଞାନରେ
ଖେଳେ ଲୁଚକାଳି ସତ୍ଯ ସୁନ୍ଦର ।
ବାଦ ବିସମ୍ବାଦ ବିରୁଦ୍ଧ ଆଭାସେ
କାହିଁକି ଈଶ୍ୱର ଧର୍ମ ଅସ୍ପଷ୍ଟ ,
ଅଜ୍ଞାନ ଅନ୍ଧାର ମୋହମାୟା ଗ୍ରାସେ
କାହିଁକି ଜୀବନ ରହସ୍ୟାବୃତ୍ତ ।
ପ୍ରବାହ ସ୍ୱଚ୍ଛନ୍ଦେ ବାଧା ପ୍ରତିବନ୍ଧ
ଶୁଷ୍କ ନିର୍ଝରିଣୀ କୁଳୁ ନିନାଦ,
କାହିଁକି ମମତା ସ୍ନେହ ପ୍ରେମପ୍ରୀତି
ସୁବିଶ୍ବାସ ଭକ୍ତି ଯୋଗେ ବିଷାଦ ।
ପ୍ରଶ୍ନମୟ ଶୂନ୍ଯ ଅସାର ସଂସାରେ
ହୁଅ ମୂର୍ତ୍ତିମନ୍ତ ଜଗତ ନାଥ ,
ହର ଦୁଃଖ କଷ୍ଟ ସନ୍ତାପ ସଙ୍କଟ
ଦେଖାଅ ଆଲୋକ ମୁକତି ପଥ ।