ପ୍ରତିଭା

ପ୍ରତିଭା ଧରି କେ ଜନମି ନ ଥାଏ ଆଗ୍ରହରୁ ହୁଏ ସୃଷ୍ଟି,

ପ୍ରତିଭାବାନ ବି ହୋଇପାରେ ଜଣେ ଥାଏ ଯଦି ଦୂରଦୃଷ୍ଟି |

ଆଗ୍ରହ ସହିତ ସୁଯୋଗ ସୁବିଧା ପରିବେଶ ସହଯୋଗ,

ଲୋଡ଼ାହୁଏ ପୁଣି କରିବାକୁ ହୁଏ ସମୟକୁ ବିନିଯୋଗ |

ଡାକ୍ତରଙ୍କ ପୁଅ ଜନମରୁ ଦେଖେ ଔଷଧ ରୋଗୀ ଚିକିତ୍ସା,

ଯନ୍ତ୍ରୀଙ୍କର ପୁଅ ଦେଖୁଛି ଶୁଣୁଛି ବାପାଙ୍କ କାର୍ଯ୍ୟ ବ୍ୟବସ୍ଥା |

ଚାଷୀପୁଅ ବୁଝେ ଚାଷ ଲାଭ-କ୍ଷତି ଫସଲ ଅମଳ କଥା,

ବେପାରୀ ପିଲାଟି ଜାଣେ ବ୍ୟବସାୟ କରେ ଧନବୃଦ୍ଧି ଚିନ୍ତା |

ରାଜନୀତିଵାଲା ପୁଅ ବୁଝେ ସିନା କ୍ଷମତା ପାଇବା କଳା,

ଶିକ୍ଷକ ପିଲାଟି ପାଠ ପଢିବାରେ କରେନାହିଁ କେବେ ଢିଲା |

ଚତୁର ଆଗ୍ରହୀ ପିଲାଟି ଦେଖିବ ସମାଜର ଗତି-ବିଧି,

କୁଳବୃତ୍ତି କ୍ଷତି ବୁଝିଗଲେ ସିଏ ଲଗାଏ ନିଜର ବୁଦ୍ଧି |

ଚିନ୍ତା କରୁକରୁ ଜ୍ଞାନ ବୃଦ୍ଧିହୁଏ ଉପାୟ ସେ ଖୋଜିବୁଲେ, 

କୁଳବୃତ୍ତି ଛାଡ଼ି ବାପାଙ୍କଠାରୁ ସେ ଉପରକୁ ଉଠିଚାଲେ |

ସେତେବେଳେ ଆମେ ସଭିଏଁ କହୁଛୁ ପ୍ରତିଭାବାନ ସେ ପିଲା,

ସବୁ ଶିଶୁଠାରେ ପ୍ରତିଭା ଲୁଚିଛି ଖୋଜି ପାରିଲେ ହିଁ ହେଲା |