ଟିକି ଆମ ଗାଆଁଟି
ଟିକି ଆମ ଗାଆଁଟି
ଟିକି ଆମ ଗାଆଁଟି
ଟିକି ଆମ ଗାଆଁଟି
ଛାଡ଼ି ଆସିଲେ ହେଲେ ବି ଭୁଲି
ନ ହୁଏ ତା'ର ନାଆଁଟି
ଟିକି ଆମ ଗାଆଁଟି ।
ଆମ ଗାଆଁର ନୂଆ ସାହିରେ
ଆମର ଟିକି ଘରଟି
ସେଇଠି ମୋର ଏନ୍ତୁଡ଼ି ଶାଳ
ଥିଲା ଜନମ ବେଳଟି ।
ସେ ଘରୁ ଦିନେ ଭାସି ଆସିଲା
ଶବଦ କୁଆଁ କୁଆଁଟି
ଟିକି ଅମ ଗାଆଁଟି ।
ତିନିଟି ଆମ୍ବ ଗଛ ଥିବାରୁ
ଗାଆଁ ଖେଳ ପଡ଼ିଆଟି
ତିନି ଆମ୍ବ ପଡ଼ିଆ ବୋଲି ସେ
ପରିଚିତ ହୋଇ ଥିଲାଟି ।
ବୋହୁଚୋରୀ ଓ କବାଡ଼ି ଗିଲି
ଖେଳୁ ବୁଲାଇ ଭୁଆଁଟି
ଟିକି ଅମ ଗାଆଁଟି ।
ଗାଆଁ ଦୂରରେ ଗହଳ ତୋଟା
ଅନ୍ଧାର ସ୍ଥାନ ଥିଲାଟି
କିରା ଖାଇଯେ ତା'ନାମ ଥିଲା,
ପିଲାଙ୍କୁ ଭୟ ଲାଗେଟି ।
ବିଲରୁ ଧାନ ଗୋଟାଇ ଆଣି
କିଣୁ ବାଦାମ ମୁଆଁଟି
ଟିକି ଅମ ଗାଆଁଟି ।
ଆମ ଗାଆଁର ବାଉତିମୂଳେ
ବୁଢ଼ୀ ଠାକୁରାଣୀ ଥାଏଟି
ମଙ୍ଗଳ ବାର ଶନିବାରରେ
ଜନ ଗହଳି ହୁଏଟି ।
ସେଠାରେ ଥିବା ଧଳା ଓ ନାଲି
କାଇଁଚ ପାଇଁ ଧାଉଁଟି
ଟିକି ଆମ ଗାଆଁଟି ।
ଆମ ଗାଆଁର ମନ୍ଦିର ସବୁ
ଆମରି ପ୍ରିୟ ସ୍ଥାନଟି
ସକାଳ ସଞ୍ଜେ ଆଳତି ବେଳେ
ଶୁଭଇ ଘଣ୍ଟା ତାନଟି ।
ଯାନି ଯାତରା ବେଳେ ଲୋକଙ୍କ
ଗହଳି ସେହି ଠାଆଁଟି
ଟିକି ଆମ ଗାଆଁଟି ।
ଆମ ଗାଆଁର ପୋଖରୀ ଜଳ
ଭାରି ତ ନିରିମଳଟି
ଗାଧୁଆ ବେଳେ ପହଁରି ଛୁଉଁ
ଗରୁଡ଼ ଖମ୍ବ ଚୂଳଟି ।
ଖରା ବେଳରେ ଗାଧୁଆ ତୁଠ
ଲାଗଇ ଖାଆଁ ଖାଆଁଟି
ଟିକି ଆମ ଗାଆଁଟି ।
ଆମ ଗାଆଁର ଛୋଟିଆ ନଦୀ
ଲୋହରାଖଣ୍ଡି ବହେଟି
ଚାଷ କାମରେ ସୁଖ ଦୁଃଖରେ
ଭରସା ସିଏ ହୁଏଟି ।
ଖରା ଦିନରେ ପିଇବା ପାଣି
ଯୋଗାଏ ତା'ର ଚୂଆଁଟି
ଟିକି ଆମ ଗାଆଁଟି ।
ଆମ ଗାଆଁର ଦଣ୍ଡ ଯାତରା,
ଚଇତ୍ର ମାସେ ହୁଏଟି
ନାଚ ତାମସା ମଜା ମଉଜେ
ତମାମ ରାତି ପାହେଟି ।
ଦଣ୍ଡ କାଳିକା ହରଙ୍କୁ ଧରି
ବୁଲନ୍ତି ଗାଆଁ ଗାଆଁଟି
ଟିକି ଅମ ଗାଆଁଟି ।
ଛୋଟିଆ ସିନା ଗାଆଁଟି ଆମ
ମଣିଷ ତା'ର ଭଲଟି
ସହାନୁଭୂତି ବ୍ୟବହାରରେ
ନ ଥଏ କିଛି ଭେଲଟି ।
ଜନ ମଙ୍ଗଳ କାମକୁ କରି
ରଖିବା ତା'ର ନାଆଁଟି
ଟିକି ଆମ ଗାଆଁଟି ।