ଓଡ଼ିଶାର ବଡ଼ ପର୍ବ ରଜ

ମୌସୁମୀ ରାଣୀର ପ୍ରଥମ ପରଶ

    ପାଇ ହସେ ରଜ ପର୍ବ

ଓଡ଼ିଶାର ବଡ଼ ପର୍ବ ଅଟେ ଏହି

    ସଂସ୍କୃତି ଓ ଗଉରବ ।

ଶୁଷ୍କ ବୃକ୍ଷ ରାଜି ପଲ୍ଲବିତ ହୁଏ

   ଆନନ୍ଦ ହୁଏ ଧରିତ୍ରୀ

ବରଷକେ ଥରେ ବିଶ୍ରାମ ମିଳିବ

   ମନରେ ଅପୂର୍ବ ଶାନ୍ତି ।

କୃଷି ପ୍ରଧାନ ମୋ ଓଡିଶା ଭୂଇଁ ଟି

   ପୃଥିବୀ କୁ ମାତା ମାନି

ତିନିଦିନ ତାକୁ ଦିଅନ୍ତି ବିଶ୍ରାମ

   ଚାରିଦିନେ ପୂଜା ପୁଣି ।

ଝିଅ ବୋହୁ ଙ୍କର ମନ ଖୁସି ହୁଏ

   କରନ୍ତିନି କିଛି କାମ

ନୂଆ ପୋଷାକରେ ସଜ୍ଜିତ ହୁଅନ୍ତି

   ସରଗ ପରି ସମାନ ।

 ପୋଡ଼ ପିଠା ଖାଇ ଖେଳିଥାନ୍ତି ଦୋଳି

    ସୁମଧୁର ଗୀତ ଗାଇ

ରଜ ପାନ ବଡ଼ ସ୍ୱାଦିଷ୍ଟ ଅଟଇ

   ମନ ନେଇଥାଏ ମୋହି ।

ସମସ୍ତଙ୍କ ଘରେ ପିଠା, ମିଠା, ଆମ୍ବ

   ପଣସ ଓ ରଜ ପାନ

ଝିଅ ମାନେ ସବୁ ଆନନ୍ଦେ ଖାଆନ୍ତି

   ସାଙ୍ଗ ଓ ସାଥି ହୋଇଣ ।

କୃଷକ, ଶ୍ରମିକ ସହ ସବୁଲୋକ

   ଖେଳନ୍ତି ପଶା ତାଆସ

କବାଡି, ବାଗୁଡ଼ି ଖେଳ ହୋଇଥାଏ

   ସଭିଙ୍କ ମନ ହରଷ ।

ବନ୍ଧୁ ବାନ୍ଧବ ମାନେ ଆସନ୍ତି ବୁଲି

   ଲାଗଇ ଯେ ଆନନ୍ଦିତ

ପ୍ରଥମ ବରଷେ ଝିଅର ଘରକୁ

   ରଜ ଭାର ଯାଏ ବହୁତ ।

ନୂଆ ଲୁଗା ସଙ୍ଗେ ଆମ୍ବ, ପଣସ ଓ

   କଦଳୀ, ନଡ଼ିଆ, ମିଠା

ବନ୍ଧୁ, ବାନ୍ଧବ ଓ ଗାଆଁ ମାନଙ୍କରେ

   ହୋଇଥାଏ ବଣ୍ଟା କୁଣ୍ଟା ।

ପ୍ରଥମରଜ ଓ ରଜ ସଙ୍କରାନ୍ତି

   ତା ପରେ ଭୂମି ଦହନ

ଚାରିଦିନେ ହୁଏ ବସୁମତୀ ସ୍ନାନ

   ରଜ ସରିଯାଏ ଜାଣ ।

ଜଗନ୍ନାଥ ଦେଶ ଓଡିଶା ରେ ହୁଏ

   ବାର ମାସେ ତେର ପର୍ବ

ଓଡ଼ିଆ ଜାତିର ଗର୍ବ ଗଉରବ

    ଅଟଇ ରଜ ପରବ ।।