ସୀତା

କର୍ତ୍ତବ୍ୟର ଲକ୍ଷ୍ମଣରେଖା

ସତୀତ୍ବର ଅଗ୍ନିପରୀକ୍ଷା

ଗୃହସ୍ଥିର ଚଉହଦୀରେ

ଆଜି ବି ପଡିଛି ବନ୍ଧା

ମୋହର ଅସ୍ତିତ୍ବ ଅସ୍ମିତା

କେବେ ମୁଁ ଅଗ୍ନିସ୍ନାତା

କେବେ ପୁଣି ଭୂମିଗତା

ତଥାପି ରହିଛି ଜୀବିତା

ମୁଁ ସତୀ ମୁଁ ସୀତା।

ବାରମ୍ବାର ପରୀକ୍ଷିତା

ସମୟର କଷଟିରେ

ମୋହର ପବିତ୍ରତା

କେବେ ପ୍ରଥାର ଛଳରେ

କେବେ କଥାର ଆଳରେ

ତଥାପି ଚାଲିଛି ପରୀକ୍ଷା

ପ୍ରତି ମୂହୁର୍ତ୍ତରେ।

ପରୀକ୍ଷାରେ ଅବତୀର୍ଣ୍ଣ ହୋଇ

ସଦା ଉତ୍ତୀର୍ଣ୍ଣ ହେବା କାଳେ

ମୋ ଜନ୍ମର ସାର୍ଥକତା

ତଥାପି ବଦଳି ପାରିନି

ଏଇ ପୁରୁଷ ପ୍ରଧାନ ସମାଜର

କୁତ୍ସିତ ଘୃଣ୍ୟ ମାନସିକତା।

ଦୁନିଆର ସବୁରି ନିୟମ

କେବଳ ହିଁ ନାରୀ ପାଇଁ

ପୁରୁଷ ତ ନ୍ୟାୟବନ୍ତ

ନ୍ଯାୟଧୀଶ ନ୍ୟାୟଦାତା

ଅନ୍ଧାରୀ ଅଦାଲତର

ଏକପାଖିଆ ଶୁଣାଣୀରେ।

ବିଧିର ବିଡମ୍ବନା ଅବା

ବାଧ୍ୟବାଧକତା ଏଇ ସଂସାରରେ

ସଭିଏଁ ସହିଯାଆନ୍ତି

ଅପମାନର ଗରଳ

ମୋ ପରି ନିଶ୍ଚୁପରେ

ପତିବ୍ରତା ଧର୍ମ ପାଳନରେ।