ଚଇତି ମଙ୍ଗଳବାର

ମାଆଲୋ ମଙ୍ଗଳ  କାରିଣୀ ସକଳ

     ଦୁଃଖ କଷ୍ଟ ପୀଡା ହରୁ

 ଭକ୍ତ କରେ ଧ୍ୟାନ ଜଗତ କଲ୍ୟାଣ

      ମଙ୍ଗଳା ଦେବୀଙ୍କୁ ସ୍ମରୁ ll

ବାଟ ଘାଟେ ପୂଜା   କରି ନାନା ସଜ୍ଜା 

       ମାଆ ତୁ ବାଟ ମଙ୍ଗଳା

ମଙ୍ଗଳ ବାରରେ   ଖୋଳାଇ ଗାତରେ

      ପନ୍ଥେଇ ମାଆ ମଙ୍ଗଳା ll

ଗୋବର ଲିପିକି   ସିନ୍ଦୁର ଦେଇକି

     ଦେଇକି ହଳଦୀ ପାଣି

ହୁଳହୁଳି ଦେଇ   ବ୍ରତକୁ କରେଇ

     ସଧବା ଘରର ରାଣୀ ll

ଅଛି କିମ୍ବଦନ୍ତୀ   ଅଭୁଲା କାହାଣୀ

    ହାଡିଆଣୀ ଚଇତିର

ମଙ୍ଗଳା କରୁଣା   ପୂଜା ବ୍ରତ ପଣା

     ଚୈତ୍ରମାସେ ମଙ୍ଗଳାର ll

ରାଜାଙ୍କ ନିର୍ଦ୍ଦେଶ   ଚଇତିର ନାଶ

     ସପ୍ତପୁତ୍ର ମୁଣ୍ଡ କାଟ

ବାରମ୍ବାର ମୁଣ୍ଡ  ଛେଚି ଖଣ୍ଡ ଖଣ୍ଡ

      ବେକରେ ମୁଣ୍ଡ ଅତୁଟ ll

ଆଶ୍ଚର୍ଯ୍ୟ ଚକିତ   ଜାଣିକି ଆଶ୍ରିତ

       ମଙ୍ଗଳାଙ୍କ କୃପାବଳେ

କରି ତପ ଧ୍ୟାନ  ହେଲେ ପୁତ୍ରବାନ

        ମଙ୍ଗଳା କରୁଣା କଲେ ll

ଚଇତ୍ର ମାସର   ମଙ୍ଗଳ ବାର ର

     ପବିତ୍ର ମଙ୍ଗଳା ବ୍ରତ

କାକଟପୁରରେ   ମଙ୍ଗଳା ମନ୍ଦିରେ

     ଘରେ ଘରେ ପୂଜେ ଭକ୍ତ ll

ବସନ୍ତ ଋତୁରେ   ବାସନ୍ତୀ ମାତାରେ

     ନବଦିନ ପୂଜାର୍ଚ୍ଚନା

ଚଇତି  ପବନେ   ମଙ୍ଗଳ ଭୁବନେ

     ମଙ୍ଗଳାଙ୍କ ଆରାଧନା ll

ଝାମୁ ପରବରେ    ଘଣ୍ଟ ପାଟୁଆରେ

      ମଙ୍ଗଳା ଆଶିଷ ନେଇ

ନିଆଁର ପଥରେ   ଚାଲଇ ପାଦରେ

      ବିସ୍ମୟ ପରା ଲାଗଇ ll

ମନ୍ଦାର ମାଳିନୀ  ସୁଖ ପ୍ରଦାୟନୀ

     ସନ୍ତୋଷ ମାଆ ଦାୟିନୀ

ସଦଜ୍ଞାନ ଶାନ୍ତି   ସଂସାର ପ୍ରଗତି

      ମଙ୍ଗଳ ମାଆ କାରିଣୀ ll