ଅଭିମାନୀ ଭକ୍ତ
ଅଭିମାନୀ ଭକ୍ତ
ମୁଁ କି ଅପରାଧ କରିଛି ପ୍ରଭୁ ହେ
ତୁମ ରାଜସଭା ତଳେ
ଛାର ମୁଁ ଭକତ ତୁମ ଦରଶନ
ଖୋଜୁଛି ଆଳତୀ ବେଳେ |
ପେଲା ଠେଲା କରି ପକାଇ ଦେଉଛ
ଛୋଟା ବୋଲି ଦୁଇ ଗୋଡ଼
ବଳ ନାହିଁ ମୋର ଜୁଝିବାକୁ କାରେ
ଖାଇଲେ ବି ଯେତେ ମାଡ଼ |
ବାଇଶି ପାହଛେ ଗଡି ଗଡ଼ି କରି
ତଳେ ମୁଁ ପଡିଲି ଖସି
ଡାକିଲି ବିକଳେ ରଖ ମହାବାହୁ
ଦେଖିଲନି ଟିକେ ଆସି |
କିପାଇଁ ଯିବି ମୁଁ ତୁମ ଦେଉଳ କୁ
ଦୁଇ ବାହୁ ଟେକିଦେଇ
ସମର୍ପି ତୁମକୁ କି ଲାଭ ପାଇବି
ଭକ୍ତି ଅର୍ଘ୍ୟ ଥାଳି ନେଇ |
ଦାସିଆ ବାଉରୀ ହସ୍ତରୁ ଶ୍ରୀଫଳ
ନେଇଥିଲ କର ଟେକି
ବନ୍ଧୁ ମହାନ୍ତି ର ବନ୍ଧୁ ବୋଲି ତୁମେ
ଜଗତେ କହୁଛ ଡାକି |
ପଣ୍ଡା ପଢିହାରୀ ତୁମ ସେବା କରି
ସେବକ ବୋଲାଉ ଥାନ୍ତି
ତୁମ ଅଙ୍ଗ ଲାଗି ନୀତି ସେ କରନ୍ତି
ଆହେ ପ୍ରଭୁ ବିଶ୍ୱ ପତି |
ମୋ ପାଇଁ କି କାହିଁ ହେଲ ଦଗାଦିଆ
କହିଦିଅ ମୁହଁ ଖୋଲି
କାହିଁକି କରୁଛ ମୋ ସାଥେ ଛଳନା
ଜଗତର ଦିଅଁ ବୋଲି |
ଦର୍ଶନ ନପାଇ ନୟନରୁ ମୋର
ନିଗିଡି ପଡୁଛି ଲୁହ
ଭାବଗ୍ରାହୀ ବୋଲି ଉଡାଉଛ ବାନା
କେମିତି ଠାକୁରେ କୁହ |
କରି ଅଭିମାନ ତୋର ବଡ଼ ଦାଣ୍ଡୁ
ଫେରି ମୁଁ ଯାଉଛି ଆଜି
ଆସିବିନି ଆଉ କେବେ ତୋର ପାଶେ
ତୋ ଦେଉଳ ବାଟ ଖୋଜି |