ସକଳ ତୀର୍ଥର ତପୋବନ ତୁମେ

ତୁମେ କରୁଣାର କୈବଲ୍ୟ କଣିକା

ଭାବ ଭକତିରେ ନାରା 

ସକଳ ତୀର୍ଥର ତପୋବନ ତୁମେ

ସଂପ୍ରୀତିର ପୁଣ୍ୟ ଧାରା ll

କୋଟି ସୌନ୍ଦର୍ଯ୍ୟର ସୀମାହୀନ ରୂପ

ପ୍ରଶାନ୍ତିର ପ୍ରତିଛବି

ସାଧନାରେ ତୁମେ ଚିନ୍ମୟ ଚେତନା

ଅଯାଚିତ ଅନୁଭବୀ ll

ବିଶ୍ୱାସରେ ତୁମେ ବିପୁଳ ବୈଭବ

ବିସ୍ମୟର ବୈଜୟନ୍ତୀ

ନିଃଶ୍ୱାସରେ ତୁମେ ନିର୍ମଳ ପବନ

ତୁମେ ପରା ଗତି ମୁକ୍ତି ll

ପ୍ରାର୍ଥନାରେ ତୁମେ ଚିନ୍ତନରେ ତୁମେ

ଶୟନେ ସ୍ୱପନେ ତୁମେ

ତୁମ ବ୍ୟତିରେକ ଆଉ ବା କିଏସେ

ଅଛି ଏହି ଧରାଧାମେ ll

ହାତ ଧରି ତୁମେ ବାଟ ଦେଖାଇବ

ଭଲ ମନ୍ଦ ସ୍ଥିତି କହି

ବାଢୁଛି ପ୍ରଣତି ପାଦପଦ୍ମେ ମତି

ରଖିଛି କଳା ଗୋସାଇଁ ll