ମିଥ୍ୟା ଅଭିନୟ
ମିଥ୍ୟା ଅଭିନୟ
ଟେକିଦେଲି ଶୂନ୍ୟକୁ ହାତ
ତୋଳି ନିଅ ମୋତେ କଳା ସାଆନ୍ତ
ଅଭିନୟ ପାଇଁ ଆସିଥିଲି ଧାଇଁ
ମର୍ତ୍ତ୍ୟ ରଙ୍ଗମଞ୍ଚେ ହୋଇ ପ୍ରେରିତ
ଭୁଲିଲି ସଂଳାପ କରୁଛି ପ୍ରଳାପ
ନୃତ୍ୟ ଗୀତ ଠାଣି ହେଲା ବିସ୍ମୃତ
ଟେକିଦେଲି ଶୂନ୍ୟକୁ ହାତ |
ଯେବେଠୁଁ ଜାଣିଲି ସବୁ ମିଥ୍ୟା ବୋଲି
ଆଉ ଅଭିନୟେ ନବଳେ ଚିତ୍ତ
କେତେ ହସ କାନ୍ଦ ବିଷାଦ ଆନନ୍ଦ
ସବୁତ ଅଳିକ ତୁମେ ଶାଶ୍ୱତ
ଟେକିଦେଲି ଶୂନ୍ୟକୁ ହାତ |
ରଙ୍ଗୀନ ଦୁନିଆ କଲାଣି ଛାନିଆ
ଷଡ଼ ରିପୁ ମେଳେ ହେଲି ନୟାନ୍ତ
ବୁଝିଗଲି ମାୟା କିମ୍ପା ହେବି ବାୟା
ଧନ ଦାରା ସୁତ ସବୁ ଅସତ୍ୟ
ଟେକିଦେଲି ଶୂନ୍ୟକୁ ହାତ |
ସତ ଚିଦାନନ୍ଦ ଗୋବିନ୍ଦ ଗୋବିନ୍ଦ
ପଦାରବିନ୍ଦ ନିସୃତ ଅମୃତ
ପାନରେ ମିଳିନ୍ଦ ହେବି ଆଦିକନ୍ଦ
ମନୋରଥ ପୂରିଯିବ ସତତ
ଟେକିଦେଲି ଶୂନ୍ୟକୁ ହାତ |
ମାତୃଗର୍ଭ ଜ୍ଞାନ ହୋଇଲାଣି ଧ୍ୟାନ
ପାଇଗଲି ପ୍ରଭୁ ନିଗମ ତତ୍ତ୍ୱ
ଭାଷେ ଜଗନ୍ନାଥ ରଖ ଜଗନ୍ନାଥ
ନୀଳାଦ୍ରି ବିହାରୀ କମଳା କାନ୍ତ
ଟେକିଦେଲି ଶୂନ୍ୟକୁ ହାତ |