Library
ଉତ୍କଳୀୟ ପରମ୍ପରାରେ ଲକ୍ଷ୍ମୀ ପୂଜନ
ଉତ୍କଳୀୟ ପରମ୍ପରାରେ ଲକ୍ଷ୍ମୀ ପୂଜନ
ମାର୍ଗଶିର ମାସ ଗୁରୁବାର ହେଲେ
ମନେ ଖୁସି ଖେଳି ଯାଏ
ପ୍ରତି ଘରଦ୍ବାର ଗୋମୟରେ ଲିପି
ଝୋଟିମାନ ପଡି ଥାଏ ।
ଶ୍ରଦ୍ଧା ଭକତିରେ ମହାଲକ୍ଷ୍ମୀଙ୍କର
ପୂଜା ଅରଚନା ହୁଏ
ପ୍ରଭାତ ହୋଇଲେ ଶଯ୍ୟା ତ୍ୟାଗ କରି
ମା ଲକ୍ଷ୍ମୀଙ୍କୁ ଡାକୁ ଥାଏ ।
ବାସି କାମ କରି ସ୍ନାହାନକୁ ସାରି
ଶୁଭ୍ର ଶାଢୀ ପିନ୍ଧି ଥାଏ
ନୂଆ ଧାନ ନୂଆ ମାଣରେ ରଖିଣ
ଧଳା ଧାନ ଶୀସା ଦିଏ ।
ହଳଦୀ ପାଣିରେ ଗୁଆକୁ ଧୋଇ ସେ
ମାଣ ପରେ ରଖି ଦିଏ
ଚାଉଳକୁ ବାଟି ଝୋଟି ସିଏ ଆଙ୍କି
ମାଆ ପାଦ ପୁଜୁ ଥାଏ ।
ଦଶ ଖିଅ ସୂତେ ବ୍ରତକୁ ଗୁଡେଇ
ଦଶ ଗୋଟି ଦୂବ ଦିଏ
ଦଶ ପୁର ସାଥେ ଦଶ ଗୋଟି ମଣ୍ଡା
ପିଠା କରି ପୂଜା ହୁଏ ।
ପଞ୍ଚାମୃତ ସାଥେ ନଡିଆ କଦଳୀ
କ୍ଷୀର ଛେନା ପଡିଥାଏ
ଅରୁଆ କୁଣ୍ଡାରେ ପିଠା କରା ଯାଇ
ମାଆଙ୍କୁ ଅର୍ପଣ ହୁଏ ।
ପ୍ରଥମରେ ବାଳଧୂପ ଓ ସଙ୍କୁଡି
ତା ପରେ ନୈବେଦ୍ୟ ହୁଏ
ଦଶ ଖିଅ ସୂତେ ଦଶଗୋଟି ନାମ
ମାଆଙ୍କର ଦିଆଯାଏ ।
ମହାଲକ୍ଷ୍ମୀଙ୍କର ପ୍ରସାଦ କେବେବି
ପରକୁ ଦିଆ ନ ଯାଏ
ବିଭା ହେଇଥିବା ଝିଅ ମଧ୍ୟ
ସେଇ
ପ୍ରସାଦ ଖାଇ ନ ଥାଏ ।
ଗୁରୁବାର ଦିନ ସତ୍ୟ ଧର୍ମେ ଥାନ୍ତି
ଆମିଷ ବର୍ଜନ ହୁଏ
ଖଇ ଭାଜନ୍ତିନି ଗୁରୁବାର ଦିନ
ଏଥି ପ୍ରତି ଧ୍ୟାନ ଦିଏ ।
ଲକ୍ଷ୍ମୀ ପୂଜା ଅଟେ ଆମର ଗୌରବ
ନୀତି ନୀୟମଟି ଥାଏ
ପରମ୍ପରା ରୀତି ନୀତି ପଦ୍ଧତିରେ
ପୂଜି ସମର୍ପିତା ହୁଏ ।
ସାଗର ଦୁଲଣୀ ବିଷ୍ଣୁ ପାଟରାଣୀ
ମାଆ ଲକ୍ଷ୍ମୀ ପୂଜା ହୁଏ
ଭକ୍ତି ବିଶ୍ୱାସରେ ଶ୍ରଦ୍ଧାରେ ଯେ
ପୂଜେ
ମା ଲକ୍ଷ୍ମୀଙ୍କୁ ନିଶ୍ଚେ ପାଏ ।
