Library
ସମ୍ପର୍କ ନଈରେ ଶରଧା ଡଙ୍ଗା
ସମ୍ପର୍କ ନଈରେ ଶରଧା ଡଙ୍ଗା
ସମ୍ପର୍କ ନଈରେ ଶରଧା ଡଙ୍ଗାଟି
ସେନେହ ମମତେ ଥାଏ
ବିଶ୍ବାସ ଭରସେ ଆଗକୁ ଆଗକୁ
ପଥ ବାହି ନିଏ ସିଏ ।
ସମ୍ପର୍କଟି ଅଟେ ନଈ ପାଣି ସୁଅ
ଭଉଁରୀ ସେଇଠି ଥାଏ
ବୁଡି ଯିବାର ତ ସମ୍ଭାବନା ବେଶୀ
ଅସତର୍କ ରହେ ଯିଏ ।
ଭୁଲ୍ ବୁଝାବଣା ଭଉଁରୀର ଖେଳ
କାଳ ଭୟଙ୍କର ହୁଏ
ସମ୍ପର୍କ ନଈରେ ଶରଧା ଡଙ୍ଗାଟି
ଅବିରାତ ଚାଲି ଥାଏ ।
ଯୋଉଠି ସନ୍ଦେହ ଆସିଯାଏ ତାର
ସେଇଠି ଅଟକି ଥାଏ
ସେନେହ ସମ୍ପର୍କେ ଧିରେ ଧିରେ ଫାଟ
ସେଇଠୁ ଯେ ଦେଖା ଦିଏ ।
ମାନ ଅଭିମାନ ଛାଡି ବୁଝାମଣା
ଯଦି ସେଠି ହେଇଯାଏ
ସମ୍ପର୍କେ ଶରଧା ଜଙ୍ଗାଟି ତାହାର
ନା ଅଧେ ଅଟକି ଥାଏ ।
ସମ୍ପର୍କଟି ଅଟେ ନଈ ପାଣି ସୁଅ
ବିଶ୍ବାସ ଭରସା ସିଏ
ସେ ଡଙ୍ଗାକୁ ହତଆଦର କରିଲେ
ନା ସେ ଆପଣାର ହୁଏ ।
ସମ୍ପର୍କ ନଈର ଶରଧା ଡଙ୍ଗାଟି
ବିଶ୍ବାସରେ ବନ୍ଧା ଥାଏ
ଅବିଶ୍ବାସ ଯେବେ ଛୁଇଁ ଯାଏ ତାକୁ
ସେଇଠି ଓହରେ ସିଏ ।
ସମ୍ପର୍କ ନଈର ଶରଧା ଡଙ୍ଗାଟି
ସତ୍ୟ ଧର୍ମ ନ୍ୟାୟେ ଥାଏ
ଅସତ୍ୟ ଅଧର୍ମ ଅନ୍ୟାୟ ହୋଇଲେ
ଦିଗ ତା ବଦଳି ଯାଏ ।
ଭଲ ପାଇବାର ସେନେହ ଡୋରରେ
ସମ୍ପର୍କଟି ରହି ଥାଏ
ବିଶ୍ବାସ ଭରସା ଶରଧା ଡଙ୍ଗାଟି
ଲକ୍ଷ୍ୟ ସ୍ଥାନେ ନେଇଯାଏ ।
ସମ୍ପର୍କ ନଈରେ ଶରଧା ଡଙ୍ଗାଟି
ଅବିରତ ରହିଥାଏ
ସେନେହ ମମତା ଭଲ ପାଇବାରେ
ସମ୍ପର୍କ ନିଭାଏ ସିଏ ।।
