ଲାଇବ୍ରେରୀ
ପ୍ରୋଫାଇଲ୍
ପ୍ରଣିପାତ
ପ୍ରଣିପାତ
ଓଡିଆ ସଂସ୍କୃତି ସଂସ୍କାର ମଧ୍ୟରେ
ପ୍ରଣିପାତ ଶ୍ରେଷ୍ଠ ମାନ
ପାଦ ଛୁଇଁ ମୁଣ୍ଡ ନୂଆଇଁ ନମିବା
ସିଏ ତ ଅଟେ ମହାନ ।
ଓଡିଆ ଚଳଣି ରୀତି ନୀତି ପ୍ରଥା
ସବୁଠାରୁ ମୂଲ୍ୟବାନ
ସଂସ୍କାର ଯା ପାଖେ ଟିକେ ହେଲେ ନାହିଁ
ମିଳେ ନାହିଁ ସନମାନ ।
ଅନ୍ୟକୁ ମାନ୍ୟତା ଦେଖାଇ ଜାଣେ ଯେ
ହୁଏ ନାହିଁ କେବେ ସାନ
ଯେଡେ ଗରିବଟି ହେଇ ଥାଉ ପଛେ
ଆଖିରେ ହୁଏନା ହୀନ ।
ପୋଥି ପୁରାଣଙ୍କୁ ଖୋଳି ତାଡି ଦେଖ
ଅଛି ପ୍ରଣିପାତ ମାନ
ରାମାୟଣ ମହାଭାରତ ପରଖ
ପ୍ରଣିପାତ ଶ୍ରେଷ୍ଠ ସ୍ଥାନ ।
ଶ୍ରଦ୍ଧା ଭକତିରେ ପ୍ରଣିପାତ କରେ
ପାଦ ଛୁଇଁ ଯେଉଁ ଜନ
ଶତ୍ରୁ ହେଲେ ମଧ୍ୟ ଆଶୀର୍ବାଦ କର
ରଖେ ସେ ତାର ମଥାନ ।
ପ୍ରଣିପାତ ମାନେ ଭୂମିଷ୍ଠ ପ୍ରଣାମ
ହାତକୁ ଯୋଡି ଶୟନ
ସ୍ନେହ ଆଶିଷଟି ମିଳେ ଯେତେବେଳେ
ସେହି ତ ଅପୂର୍ବ ଧନ ।
ପ୍ରଣିପାତକୁ ବି ଓଳଗି କହନ୍ତି
ଏକଥା ଭୁଲନି ମନ
ଭୂମିଷ୍ଠ ଓଳଗି ପ୍ରଣିପାତ ଅଟେ
ସେଇ ତ ପ୍ରକୃତ ମାନ୍ୟ ।
ଦେବାଦେବୀ ଅବା ଗୁରୁ ଗୁରୁଜନ
ଯୋଗୀ ଋଷି ମୁନି ଜନ
ସାଷ୍ଟାଙ୍ଗ ଭୂମିଷ୍ଠ ପ୍ରଣିପାତ ହେବ
ମନେ ରଖିଥିବ ଧନ ।
ଯଦି ଅପମାନ ମିଳି ଥିବ କେବେ
ଛାଡି ଦେବ ଅଭିମାନ
ଗୁରୁଜନ ପାଦ ଛୁଇଁ ପ୍ରଣିପାତ
କରିବ ଦେଇ ସମ୍ମାନ ।
ତାଙ୍କରି ଆଶିଷେ ସୁଖ ଶାନ୍ତି ପ୍ରାପ୍ତ
ହସିବ ଏଇ ଜୀବନ
ପ୍ରଣିପାତ ତୁମେ କର ବା ଯାହାକୁ
ସିଏ ଦେବ ଭଗବାନ ।
