ଅତୀତ ସ୍ମତିରୁ କହିବା ପଦେ
ଅତୀତ ସ୍ମତିରୁ କହିବା ପଦେ


ଅତୀତ ସ୍ମୁତିର କବିତା ମାଳାରେ
ଆଜି ରଜଦୋଳି ଗୀତ
ସାଉଁଟି ଆଣୁଛି ସାହିତ୍ୟ ସଂସଦ
ମନ ହୁଏ ପୁଲକିତ ।
ମନେ ପଡେ ସେଇ ଆମ୍ବ ତୋଟା ମାଳ
ରଜ ଦୋଳି ଝୁଲା ଗୀତ
ଗୀତ ତାଳେ ତାଳେ ଦୋଳି ଝୁଲୁ ଥାଏ
ଦେହ ହୁଏ ଉଲ୍ଲସିତ ।
ଦୁଇ ପଟେ ଦୁଇ ଜଣ ବାହୁ ଥାନ୍ତି
ମଝିରେ ବସନ୍ତି ସେ ତ
ଏ ଡାଳ ସେ ଡାଳ ବାଜି ଯାଏ ଯେବେ
ମନ ହୁଏ ଭୟଭୀତ ।
ରଖ ରଖ ଦୋଳି କହି ଡାକୁ ଥାନ୍ତି
କରନ୍ତିନି କର୍ଣ୍ଣପାତ
ଥଟ୍ଟା ମଜା କରି ଜୋରରେ ବାହାନ୍ତି
ଗାଇ ସେ ଅନେକ ଗୀତ ।
ପୁର ଦିଆ ମୁଆଁ ପିଠା ଖାଉଥାନ୍ତି
ହସି ଗାଉଥାନ୍ତି ଗୀତ
ପାଣି ଢୋକେ ଢୋକେ ପିଉଥାନ୍ତି ଖାଇ
ପୋଡ ପିଠା ଧରି ହାତ ।
ପାଟିରେ ପକାଇ ରଜ ଖିଲି ପାନ
ସଜ ହୋଇଥାନ୍ତି ସେ ତ
ନୂଆ ବସ୍ତ୍ର ପିନ୍ଧି ଦୋଳି ଖେଳୁଥାନ୍ତି
ନା ଆସି ଖାଆନ୍ତି ଭାତ ।
ଯିଏ ଯେତେ ଡାକୁ ଶୁଣନ୍ତିନି କେହି
ପିଠା ନିଅନ୍ତି ସଙ୍ଗତ
ପିଠା ଖାଇ ଖାଇ ଦୋଳି ଖେଳୁ ଥାନ୍ତି
ଗୀତରେ ମନ ଉସତ ।
ବୋହୂମାନଙ୍କର ଓଢଣୀ ଖସିଲେ
ଟାହି ଟାପରାର ଗୀତ
ଥନ୍ତଲ ପେଟକୁ ଦେଖିଲେ କାହାର
ଢଗରେ ଗାଆନ୍ତି ସେ ତ ।
ସମସ୍ତଙ୍କ ପାଇଁ ଗୀତ ଗାଉଥାନ୍ତି
ଗଛେଇ ଗଛେଇ ସେ ତ
ତିନି ଦିନ ଧରି ଦୋଳି ଖେଳି ସିଏ
ଗୀତରେ ହଜାନ୍ତି ଚିତ୍ତ ।
ସେଇ ବରଗଛ ଆମ୍ବ ତୋଟା ମାଳ
ହୋଇଛି ଆଜି ଅତୀତ
ବୃକ୍ଷକୁ କାଟିଣ ଏଇତ ମାନବ
ଖୁସିରୁ ହୁଏ ବଞ୍ଚିତ ।
ଦେଖା ଯାଉ ନାହିଁ ସେଇ ଆତ୍ମୀୟତା
ସେଇ ରଜଦୋଳି ଗୀତ
ସେନେହ ମମତା ଫିକା ଫିକା ଲାଗେ
ଭାବି ଲାଗୁଛି ବିସ୍ମିତ ।
ତଥା
ପି ଏବେବି ହୃଦୟ ଇଲାକୁ
ଭାସେ ରଜ ଦୋଳି ଗୀତ
ଅତୀତରେ ଥିଲା ଏବେବି ରହିଛି
ରହିବ ସେ ଭବିଷ୍ୟତ ।
*ରଜ ଦୋଳି ଗୀତ:-*
ଡେରିଲି ଗଉରୀ ବେତ
ସର୍ବ ମଙ୍ଗାଳାଙ୍କୁ ମୋ ଦଣ୍ଡବତ
ବଉଳଲୋ
ଆରମ୍ଭିଲା ଦୋଳି ଗୀତ ।
ବଉଳଲୋ ।
ରଜ ଦୋଳି କଟମଟ
ମୋ ଭାଇ ମୁଣ୍ଡରେ ସୁନା ମୁକୁଟ
ସୁନା ମୁକୁଟଲୋ
ଦିଶୁଥାଏ ଝକମକ
ମୋ ଦୋଳିଲୋ ।
ପାଚିଲା ଆମ୍ବରୁ ଫାଳେ
କାହା ଘର ବୋହୂ ଛିଡା ହୋଇଛ ଲୋ
ଓଢଣୀ ଖସିଛି ତଳେ ।
ମୋ ଦୋଳିଲୋ
କଇଁଆ ଗଛଟି ମଲା
ଏଇକଡେ କିଏ ସାଇକେଲ୍ ନେଲା
ସାଇକେଲ୍ ନେଲା ଲୋ
ଅତର ବାସନା ଦେଲା ।
ମୋ ଦୋଳିଲୋ ।
ସଜନା ମୂଳେ ପାଉଁଶ
ଆମ ଗାଆଁ ଭେଣ୍ଡିଏ ଗାତରେ ପଶ
ଗାତରେ ପଶଲୋ
ମାଇ ପେ ଛାଡିବେ ନିଶ ।
ମୋ ଦୋଳିଲୋ ।
କଇଁଆ ପତର ସରୁ
ତୋତେ ନେଇଯିବି ସମ୍ବଲପୁରୁ
ସମ୍ବଲପୁରୁଲୋ
ଧାନ କଟାକୁଟି ସରୁ
ମୋ ଦୋଳିଲୋ ।
ବନସ୍ତେ ଡାକିଲା ଗଜ
ବରଷକେ ଥରେ ଆସିଛି ରଜ
ଆସିଛି ରଜ ଲୋ
ଘେନି ହୁଅ ସଜବାଜ ।
ଲଙ୍କ ମାରିଚଟି କଷି
ପଧାନ ଝିଅଟି ଷୋଳ ବୟସୀ
ଷୋଳ ବୟଷୀଲୋ
ପିଣ୍ଡାରୁ ପଡିଲା ଖସି ।
କୂଅରେ ପଡିଲା ମାଛି
ସରୁଚୂଡା ଖାଇ ଘଇତା ବାଛି
ଘଇତା ବାଛିଲୋ
ଉପର ସାଇରେ ଅଛି ।
ମୋ ଦୋଳିଲୋ ।
କୁଅରେ ପଡିଲା ବାଟି
ଆଉ ଦିନେ ବାଟି ପଡିବୁ ନାହିଁରେ
ମୋ ଭାଇ ଖେଳିବ ବାଟି ।
ରଜ ଦୋଳି ଝୁଲିଲାଣି
ଖେଳିବାକୁ ଯିବା ସାଙ୍ଗ ଭଉଣୀ
ସାଙ୍ଗ ଭଉଣୀଲୋ
ବେଳ ଉଛୁର ହେଲାଣି ।
ଅଳତା ପାଦେ ନାଇଣ
ଆଖିରେ ମାଖିବା କଳା ଅଞ୍ଜନ
ବଉଳଲୋ
ବେଣୀ ବାନ୍ଧିବା କରି ଯତନ ।
ବଉଳଲୋ ।
ରଜ ଦୋଳି ଖେଳୁଥିଲି
ବାପା ଡାକିଦେଲେ ଯଶୋଦା ବୋଲି
ଯଶୋଦା ବୋଲି ଲୋ
ଦୋଳିରୁ ଖସି ପଡିଲି ।
ବଉଳଲୋ ।
ପୋଡ ପିଠା କ୍ଷୀରି ପୁରି
ଖାଇବା ମିଶିଣ ସରୁ ଚକୁଳି
ବଉଳଲୋ
ରଜ ଚାରି ଦିନ ଯିବ ସରି ।
ବଉଳଲୋ ।