ଟଙ୍କା
ଟଙ୍କା
ଟଙ୍କା ଟଙ୍କା କହି ଜୀବନର ଲକ୍ଷ୍ୟ
ସବୁ ତୁ ପାଶୋରି ଦେଲୁ
ଟଙ୍କାର ମୋହରେ ଜୀବନକୁ ତୁ ଯେ
ଅଡୁଆ ତଡ଼ୁଆ କଲୁ ।
ଟଙ୍କା ମଣିଷର ବଞ୍ଚିବା ପାଇଁ କି
ନିହାତି ଯେ ଆବଶ୍ୟକ
ଟଙ୍କାର ମୋହରେ ବାନ୍ଧି ହୋଇଗଲେ
ଜୀବନ ହେବ ଯେ କଷ୍ଟ ।
ଟଙ୍କା ରୋଜଗାର କରିବାକୁ ଯାଇ
ଯଦି ନିଜକୁ ଭୁଲିଲୁ
ଦଉଡ଼ି ଦଉଡି ଧଇଁ ସଇଁ ହୋଇ
ଜୀବନ କୁ ବୋଝ କଲୁ ।
ଟଙ୍କା ରୋଜଗାର କରିବାକୁ ଯାଇ
ଯଦି ଶାନ୍ତି ହରାଇଲୁ
କି ହେବ ସେ ଟଙ୍କା ଜୀବନକୁ ଯଦି
ଉପଭୋଗ ତୁ ନ କଲୁ ।
ଟଙ୍କା ରୋଜଗାର ନିଶା କରି ଯଦି
ଆପଣା ଜନେ ଭୁଲିଲୁ
ସମ୍ପର୍କର ସ୍ଵାଦ କେତେ ଯେ ନିରାଲା
ତାହା କେମିତି ଜାଣିବୁ ।
ଟଙ୍କା ଟଙ୍କା କହି ଜୀବନ କୁ ଯଦି
ଜଞ୍ଜାଳ ମୟ କରିଲୁ
କେମିତି ବୁଝିବୁ ଜୀବନ ସୌନ୍ଦର୍ଯ୍ୟ
ଆଖି ଥାଇ ଅନ୍ଧ ହେଲୁ ।
ଟଙ୍କା ପାଇଁ ତୁହି ପତି,ପତ୍ନୀ, ବନ୍ଧୁ
ସନ୍ତାନେ ସମୟ ନ ଦେଲୁ
ସମ୍ପର୍କର ଡୋର ହୁଗୁଳା ହୋଇଲା
ଶେଷେ ଏକା ହୋଇ ଗଲୁ ।
ଟଙ୍କା ପାଇଁ ଯଦି ଆତ୍ମାର ସଂସ୍କାର
ଉପରେ ଧୂଳି ଢାଙ୍କିଲୁ
ଶାନ୍ତି ଖୋଜିଲେ ତୁ କେଉଁଠୁ ପାଇବୁ
ନିଜକୁ ତ ନ ଦେଖିଲୁ ।
ଆରେ ବାଇମନ ମନ ଦେଇ ଶୁଣ
ଜୀବନେ ଟଙ୍କାର ଲୋଡ଼ା
ହେଲେ ଟଙ୍କା ପାଇଁ ମଣିଷ ଜୀବନ
ସାର୍ଥକତା ଭୁଲି ନ ଯାଆ ।