Library
ତୋର ବାଇଶି ପାହାଚେ ଗଡି ଗଡି
ତୋର ବାଇଶି ପାହାଚେ ଗଡି ଗଡି
ତୋର ଶରଧା ବାଲିକୁ
ମୁଣ୍ଡେ ମାରି
ତୋର ଜଗନ୍ନାଥ ନାମ
ତୁଣ୍ଡେ ଧରି
ସିଂହ ଦ୍ଵାରେ ତୋର
ଗୀତ ଗାଇ ଗାଇ
ତୋର ବଡଦାଣ୍ଡେ
ଚାଲି ଚାଲି ଯାଇ
ତୋର ବାଇଶି ପାହାଚେ
ଗଡି ଗଡି
ତୋର ରଥ ଦଉଡିକୁ
ଭିଡ଼ି ଭିଡି
ମୋ'ର ପିଣ୍ଡୁ ପ୍ରାଣ
ଯାଆନ୍ତା କି ଛାଡି ?
ତୋର ଟଙ୍କ ତୋରାଣିକୁ
ପାନ କରି
ତୋର ଅବଢ଼ା ଅନ୍ନକୁ
ଭୁଞ୍ଜି କରି
ତୋର ଅଇଁଠା କୈବଲ୍ୟ
ସାଉଁଟି କରି
ତୋର ନିର୍ମାଲ୍ୟ କଣିକା
ତୁଣ୍ଡେ ମାରି
ତୋର ଛଡା ତୁଳସୀକୁ
ହାତେ ଧରି
ମୋ'ର ପ୍ରାଣ
ଯାଆନ୍ତା କି ଛାଡି ?
ତୁ ମହାବାହୁ
ତୋର ରତ୍ନ ସିଂହାସନ
ତୁମ ତିନି ଭାଇଭଉଣୀଙ୍କ
ଚତୁର୍ଦ୍ଧା ମୂର୍ତ୍ତିକୁ ଦରଶନ କରି
ତୋର ମୁକ୍ତିମଣ୍ଡପରେ
ପାପ ପ୍ରାୟଶ୍ଚିତ କରି
ତୋର ନୀଳଚକ୍ର ବାନାକୁ
ପାପ ନେତ୍ରେ ଦରଶନ କରି
ମୋ'ର ପାପ ପଙ୍କିଳ ଏ ଶରୀରୁ
ମୋ ପ୍ରାଣ ଯାଆନ୍ତା କି ଛାଡି ?
ତୋର କୋଇଲି ବୈକୁଣ୍ଠ
ଦରଶନ ସାରି
ସବୁ ପାର୍ଶ୍ଵ ଦେବାଦେବୀଙ୍କୁ
ମନ ଭରି ବୁଲି ସାରି
ତୋର ବାଇଶି ପାହାଚେ
ଗଡି ଗଡି
ଏ ପିଣ୍ଡୁ ପ୍ରାଣ ମୋ'ର
ଯାଆନ୍ତା କି ଛାଡି ?
ତୋ କଳାବଦନ
ତୋ ଚକା ନୟନ
ତୋ ରତ୍ନସିଂହାସନ
ଅରୁଣ ସ୍ତମ୍ଭକୁ କୁଣ୍ଢାଇ
ସବୁ ଦରଶନ ସାରି
ବାଇଶି ପାହାଚେ
ଗଡି ଗଡି
ପିଣ୍ଡୁ ପ୍ରାଣ ମୋ'ର
ଯାଆନ୍ତା କି ଛାଡି ?
ତୋର ନଟକୂଟ
ହେ କଳା ସାଆନ୍ତ
ମୁଁ ଜାଣିବି କେମନ୍ତ
ତୋର ରଥ ଭିଡୁ ଭିଡୁ
ରଥ ଚକ ମାଡି
ମୋ ପିଣ୍ଡୁ ପ୍ରାଣ
ଯାଆନ୍ତା କି ଛାଡି ?
ତୋର ନାମ ଧରି
ଯାଇ ତୋର ଧାମ ପୁରୀ
ବାଇଶି ପାହାଚେ ଗଡି ଗଡି
ମୋ'ର ପିଣ୍ଡୁ ପ୍ରାଣ
ଯାଆନ୍ତା କି ଛାଡି ?
