ସୁରଭିହୀନା ମୁଁ ବୋଲି

ଧୀର ପବନରେ ଝୁଲି ଝୁଲି ମୁହିଁ

         ବୃକ୍ଷ ଡାଳରେ ଫୁଲଟିଏ ହୋଇ 

            ଫଗୁଣରେ ଖେଳେ ଦୋଳି ,

              ରଙ୍ଗଟି ମୋହର ନାଲି

ସୁରଭିହୀନା ମୁଁ ବୋଲି ....୧

ସହଜେ ପାଏନି କାହାରି ଆଦର

        ଚଇତି ବାଆରେ ଯାଏ ଦୋହଲି 

             ମୃଦୁ ଶିହରଣେ ଖେଳି ,

                 ସବୁ ଦୁଃଖ ମୋର ଭୁଲି

ସୁରଭିହୀନା ମୁଁ ବୋଲି.... ୨

ସାଜେନା ମୁଁ କେବେ ଗଭାରେ କାହାରି

        ବଇଶାଖି ତାତି ଦେହରେ ବୋଳି

             ଶତ ଯନ୍ତ୍ରଣାକୁ ଭୁଲି ,

                "ପଳାଶଫୁଲ" ମୁଁ ନାଲି

ସୁରଭିହୀନା ମୁଁ ବୋଲି.... ୩

ଭାବେ ଉଡ଼ିଯିବି ପବନ ସାଥିରେ

       ଆକାଶେ ମୋ ରଙ୍ଗ ଦିଅନ୍ତି ବୋଳି ,

             ସରଗ ରାଇଜେ ବୁଲି

               ସବୁ ଅପବାଦ ଭୁଲି

ସୁରଭିହୀନା ମୁଁ ବୋଲି.... ୪