ତୁମ ଅପେକ୍ଷାରେ
ତୁମ ଅପେକ୍ଷାରେ
ମାଟି ମା ଅନେଇ ଅନେଇ
ତା ଆଖି ଥକି ଗଲାଣି
ଡ଼ହ ଡହ ଖରା କି ଅସହନୀୟ
ସାରା ଦେହଟା ଶିଝି ଗଲାଣି
ଘଞ୍ଚ ଘାସ ଫୁଲ ଖସି ଖସି
ଦେହରେ ମିଶି ଗଲାଣି ।
ଦେହ ହାତ ଗର ଗର ଫାଟି ଫାଟି
ଆଁ ମେଲା କଲାଣି।
ତଥାପି ଧର୍ଯ୍ୟ ହରା ନ ହୋଇ
ଚାତକ ସଦୃଶ
ଅନାଇ ରହିଛି ତୁମ ଆସିବା ବାଟକୁ
ଆସିବ ଆସିବ ବୋଲି
ଟିକେ ସୂଚାଇ ଦେଲ
ଘଡଘଡି, ଚଡଚଡ଼ି, ବିଜୁଳି ଆଲୁଅର ରୋଷଣୀ ମାଧ୍ୟମରେ...
ବେଙ୍ଗ ବେଙ୍ଗୁଲି ରଡ଼ି କରି
ପେଁ କାଳି ବଜାଇ ନାଚୁଛନ୍ତି
ଖାସ ତୁମେ ଆସିବ ବୋଲି
ହେଲେ ତୁମେ ଏ ପର୍ଯ୍ୟନ୍ତ ଆସୁନ
ଆସନା ଥରେ
ତୁମରି ପହିଲି ପରଶରେ ଭିଜା
ମୋ ଦେହର ବାସ୍ନା ତୁମକୁ ବିଭୋର କରିବ
ମୋ ଠାରେ ଥିବା ଖାଲ ଖମା ଭରି ଦେଇ
ମୋତେ ଅଙ୍କୁରଣ କରିବ
କଥା ମାନି ଆସନା ଥରେ
ସବୁଜ ରଙ୍ଗର ଉତ୍ତରଣ ପିନ୍ଧି
ତୁମକୁ ଚାହିଁ ମୁଁ ଖିଲି ଖିଲି ହସୁଥିବି
ମେଘ ଗୋ ତୁମେ!
ତୁମ ଅପେକ୍ଷାରେ ମୁଁ ମାଟି ।