ସଙ୍ଗୀତ ସୁରଭି
ସଙ୍ଗୀତ ସୁରଭି
ରୂପସୀ-ଲଳନା ସଙ୍ଗୀତ ମୂର୍ଚ୍ଛନା
ସା-ରେ-ଗା-ମା-ପା ର ସୁରେ,
ନିନାଦିତ କରେ ପ୍ରତିଟି ହୃଦୟ
ଆନନ୍ଦ ଉଲ୍ଲାସ ଭରେ ।
ସୁର ତାଳ ତବ ନଭ ଶୋଭା ତାଳେ
ପ୍ରାଣେ ଭରେ ଅନୁରାଗ,
ହଂସ ହସଂରାଳୀ ଭାବ ସୁରେ ମତ୍ତ
ଝରୁଛି ସତେ ବିଭବ ।
କୀଟ ତରୁ ଲତା ସ୍ଥାବର ଜଙ୍ଗମ
ପଶୁ ପକ୍ଷୀ ମନ ହୃଦେ,
ଯକ୍ଷ ରକ୍ଷ ଅବା ଗନ୍ଧର୍ବ କିନ୍ନର
ବିମୋହିତ ଛାନ୍ଦ ଛନ୍ଦେ ।
ବ୍ଯଥା ଭୁଲିଯାଏ ବ୍ୟଥିତ ହୃଦୟ
ଆତ୍ମଜ୍ଞାନ ବଳି ଦେଇ,
ଚାତକ ପରାୟେ ଚାହିଁ ରହିଥାଏ
ସଙ୍ଗୀତ ଝଙ୍କାର ପାଇଁ ।
ବରଷାର ମନ ହୁଏ ଛନ୍ନ ଛନ୍ନ
ବର୍ଷିବାକୁ ସୁର ତାଳେ,
ସାତ ସୁରେ ବନ୍ଧା ଜୀବନର ଗାଥା
ଚେତାଇ ଦେବାକୁ ହେଳେ l
ସଙ୍ଗୀତ ସୁରଭି ବିଚ୍ଛୁରିତ ହେଲେ
ଆତ୍ମାକୁ କରେ ବିଭୋର,
ଦ୍ୱାପରେ ପ୍ରମାଣ ହୋଇଛି ମର୍ତ୍ତ୍ୟରେ
ମୋହନ ବଂଶୀର ସ୍ଵର ।