ସମ୍ପର୍କ

ଦେହେ ନାହିଁ ବଳ ବାଡ଼ିଟି ସମ୍ବଳ 

ଚାଲୁଅଛି ନଇଁ ନଇଁ,

ତଥାପି ସରାଗ ମନେ ଜାଗେ ଆଗ 

ନାତି ନାତୁଣୀଙ୍କ ପାଇଁ । 

ପିଠିରେ ପକାଇ ଚାଲେ ଖୁସି ହୋଇ

ଗାଆଁ ଦାଣ୍ଡରେ ବୁଲେଇ, 

କରିଲେ ଅଝଟ ମାରେ ନାହିଁ ଛାଟ 

ମନାଏ ଗପକୁ କହି ।

ଏହି ତ ସେନେହ ଶରଧା ଆଦର 

ଜେଜେ-ଜେଜି ମାଆଙ୍କର, 

ନାତି ନାତୁଣୀଙ୍କ ସୁଖ ପାଇଁ ନିତି

ଝୁରେ ମନ ନିରନ୍ତର । to

ଜେଜେ-ଜେଜି ସୁଖ ମମତା ସାଗର 

ମନଟି ତାଙ୍କ ମନ୍ଦିର 

କେଡ଼େ ମନୋହର ହୃଦୟ ତାଙ୍କର 

କୋଟି ମଣି ପଟାନ୍ତର ।

ବିଧିର ବିଧାନେ ମର୍ତ୍ତ୍ୟ ବଇକୁଣ୍ଠେ

ତାଙ୍କରି ସ୍ନେହ ଆଦର

କୋଟି ହୀରାସମ ଅମୂଲ୍ୟ ରତନ 

ଆଶିଷର ସମାହାର ।