ସମୟର ସନ୍ତାନ

ସମୟର ତିନି ସନ୍ତାନ, ଅତୀତ,

               ବର୍ତ୍ତମାନ, ଭବିଷ୍ୟତ,

ଜ୍ୟେଷ୍ଠ ସନ୍ତାନ ତା', ଅତୀତ ମରିକି,

                 ପାଲଟି ଗଲାଣି ଭୁତ !

ମଧ୍ୟମ ସନ୍ତାନ, ବର୍ତ୍ତମାନ ସହ,

                  ରହିଅଛି ସିଏ ଏକା,

ଭବିଷ୍ୟତ ଅଛି, ମାଆର ପେଟରେ,

               ଏ ଯାଏ ଦେଇନି ଦେଖା !

ପ୍ରଥମ ସନ୍ତାନ, ଅତୀତ କଥାକୁ,

                  ପାରିନି ସମୟ ଭୁଲି,

ଆଗକୁ ବଢ଼ି ବି, ମନେ ପକାଉଛି,

                  ଯାଇଅଛି ଯାହା ଚାଲି !

ଅତୀତ ଯେତିକି, କୁକର୍ମ କରିଛି,

                   ସେଥିପାଇଁ ଦଣ୍ଡ ପାଏ,

ସୁକର୍ମ ପାଇଁକି, ପୁରସ୍କାର ମଧ୍ୟ,

                  ସମୟକୁ ମିଳିଥାଏ !

ଏବେ ଏକା ତାର, ମଧ୍ୟମ ସନ୍ତାନ,

                 ବର୍ତ୍ତମାନ ଅଛି ପାଶେ,

ତାହା ନିର୍ଦ୍ଦେଶରେ, ସମୟ ସର୍ବଦା,

                 କର୍ତ୍ତବ୍ୟ ପଥରେ ଆସେ !

ବର୍ତ୍ତମାନ ତାର, ପିତା ସମୟକୁ,

                  ସଦାବେଳେ ଥାଏ ଜଗି,

ତା' କଥାକୁ ଯଦି, ସମୟ ମାନେନା,

                 ବହୁ ପୀଡା ଥାଏ ଭୋଗି !

ତୃତୀୟ ସନ୍ତାନ, ଭବିଷ୍ୟତ ତାର,

                   ଆଜିଯାଏ ଆସିନାହିଁ,

ତଥାପି ସମୟ, ବହୁତ ଯୋଜନା,

                   କରିଅଛି ତାହା ପାଇଁ !

ବୀମା କରିଅଛି, ସଞ୍ଚୟ କରିଛି,

                    ଗଢ଼ିଅଛି ନୂଆ ଘର,

ଭବିଷ୍ୟତ ପାଇଁ, କରୁଅଛି ସିନା,

                 ବର୍ତ୍ତମାନକୁ ତା' ଡର !

ଭବିଷ୍ୟତ ଯେବେ, ଜନମ ଲଭିବ,

                 ହୋଇବ ସେ ବର୍ତ୍ତମାନ

ଏବେ ଯାହା ନାମ ବର୍ତ୍ତମାନ ଅଛି,

               ଅତୀତେ ନେବ ସେ ସ୍ଥାନ !