kahnu charan sahu

Children


3  

kahnu charan sahu

Children


ସ୍ମୃତି

ସ୍ମୃତି

1 min 230 1 min 230

ସ୍ମୃତି କେବେ ଏକ ହଜିଲା ଅତୀତ

କେବେ ସେ ମଳୟ ବାଆ

କେବେ ମଧୁମତି ପ୍ରିୟାର ପୀରତି

ଅଭୁଲା ତାଆର ଛୁଆଁ ।


ସ୍ମୃତି କେବେ ଅଟେ ସକାଳ ସୂରଜ

ବିଛଉଥିବା କିରଣ

କେବେ ପଶ୍ଚିମ ଆକାଶେ ତୋଳୁଥିବା

ରକ୍ତିମ ଛବି ତୋରଣ ।


ସ୍ମୃତି କେବେ ସାଜେ ସାଗର ଲହରୀ

ଧୋଇଯାଏ ଦୁଃଖକଷ୍ଟ

କେବେ ଜୀବନରେ ଭରି ଯନ୍ତ୍ରଣା

କରିଥାଏ ପଥଭ୍ରଷ୍ଟ ।


ସ୍ମୃତି କେବେ ଅଟେ ପିଲାଦିନ ମନ

ଖୋଜୁଥିବା ପିଳାଖେଳ

କେବେ ସିଏ ବୟସର ଯଉଘରେ

ନୃତ୍ୟରଙ୍ଗା ପ୍ରେମକାଳ ।


ସ୍ମୃତି କେବେ ଅଟେ ନୀଳ ଆକାଶର

ଜୋଛନାରେ ଭରା ରାତି

କେବେ ପାଗଳ ଭଅଁର ଖୋଜୁଥିବା

ପ୍ରିୟାର ଉଷୁମ ତାତି ।


ସ୍ମୃତି କେବେ ଲାଗେ ସବୁଜ ସୀମାରେ

ପ୍ରହରୀ ସଜା ସୈନିକ

କେବେ ଯାଯାବର ଦିନ ଅନ୍ଧକାର

ପେଟ ଖୋଜୁଥିବା ଭୋକ ।


ସ୍ମୃତି କେବେ ପଳାଶ ଫୁଲର ବାସ

ଦୂରରୁ କିଣଇ ମନ

କେବେ ପାଶେ ଥାଇ ଭ୍ରମିତ ବଦନେ

ଚାହୁଁଥିବା ରୂପା ଜହ୍ନ ।


ସ୍ମୃତି କେବେ ଅଟେ ହାଡ଼ଭଙ୍ଗା ଶୀତ

ଗ୍ରୀଷ୍ମେ ବୋହୁଥିବା ଝାଳ

ବସନ୍ତର ରାଗ ବରଷା ଋତୁର 

ପୋଖରୀ ଗାଡ଼ିଆ ଜଳ ।


ସ୍ମୃତି ଅସରନ୍ତି ଭାବନା ସମ୍ଭାର

ଭିଜାଏ ଅତୀତ ରାଗେ

ସ୍ମୃତି ଇତିହାସ ମାନସପଟର

ହୃଦୟରେ ଛବି ଆଙ୍କେ ।।



Rate this content
Log in

More oriya poem from kahnu charan sahu

Similar oriya poem from Children