ରାଜନୀତି

ରାଜନୀତି ଏଠି ଲୁଟିବା ପାଇଁକି

ମେଲାଇ ବସିଛି ଡେଣା

ଶାସନ ନାଆଁରେ ଶୋଷଣ ଚାଲିଛି

ସଭିଙ୍କୁ ଏକଥା ଜଣା ।

ସବୁଜାଣି ଶୁଣି କିଛି ଦାମ୍ ପାଇଁ

ବିକଇ ଜନତା ଭୋଟ

ଉନ୍ନତି ନାଆଁରେ ମୂଳପୋଛ ହୁଏ

ବଦଳେ ବିକାଶ ବାଟ ।

ବିକାଶ ଯାହାକୁ କୁହନ୍ତି ଶାସକ

ରଙ୍ଗବୋଳା କାର୍ଯ୍ୟକ୍ରମ

ପ୍ରକୃତ ହିସାବେ ବିକାଶ ରାଇଜେ

ସୃଷ୍ଟି କରେ ମତିଭ୍ରମ ।

ଶିକ୍ଷା ଠାରୁ ସେବା ସବୁଠି ଘୋଟାଲା

ବାଛ ଓ ବି-ଚାରା ନୀତି

ମାଙ୍କଡ଼ ହାତରେ ଶାଳଗ୍ରାମ ଦେଇ

ଗଢୁଥାନ୍ତି ମୂଳଭିତ୍ତି ।

ମୂଳଦୁଆ ଏଠି ପ୍ରାୟତଃ ଦୁର୍ବଳ

ମାଳମାଳ ପ୍ରତିଶ୍ରୁତି

ପାଞ୍ଚବର୍ଷେ ଥରେ ମଞ୍ଚ ଆଗେ ମିଳେ

ବିକାଶର ମନ୍ତ୍ରବଟି ।

ଭକୁଆ ଜନତା ଉପଭୋଗେ ମାତେ

ନେତାଙ୍କ ମନୋରଞ୍ଜନ

ନାଚଗୀତେ ସରେ ବିକାଶର ଚିଠା

ଦୁଲୁକେଇ ମଞ୍ଚପ୍ରାଣ ।