ସମର୍ପିତ ଜୀବନ କାହାଣୀ

ହୃଦୟରେ ମୋର ପ୍ରୀତି ନିର୍ଝରିଣୀ

ବୁହାଇଛ ତୁମେ ସଖୀ

ତୁମପାଇଁ ଆଜି ସୁନ୍ଦର ଦୁନିଆ 

ଦେଖୁଛି ମୋର ଏ ଆଖି I

ନିତି ଦେଖୁଛି ମୁଁ ନାନାଜାତି ଫୁଲ

ଆଘ୍ରାଣ କରୁଛି ବାସ

ଯେବେଳେ ଦେଖୁଛି ତୁମ ରୂପଛଟା

ମୁହଁରେ ଫୁଟୁଛି ହସ I

ତୁମେ ତ ଭରିଛ ମୋ ଆଖିରେ ସ୍ୱପ୍ନ

ଦେଖାଇଛ ନୂଆ ରାହା

ତୁମପାଇଁ ଆଜି ଏ ଦୁନିଆ ମୋତେ

ଲାଗୁଛି ଲୋ ନୂଆ ନୂଆ I

ଚଲାବାଟେ ମୋର ତୁମରି ପ୍ରେମର

ମହକ ଦେଇଛ ବିଞ୍ଚି

ତୁମ ପ୍ରେମ ମଧୁ ଆସ୍ୱାଦନ ପାଇଁ

ସାଜିଛି ମୁଁ ମଧୁମକ୍ଷି I

ଦିନେ ଦେଖିଥିଲି ସପନରେ ଯାହା

ସତ କରିଦେଲ ତୁମେ

ମୋ ଆଖିରେ ତୁମ ଆଖିକୁ ମିଶାଇ

ଭିଜାଇଲ ତୁମ ପ୍ରେମେ I

କଥା ଦେଉଅଛି ସାରା ଜୀବନ ମୁଁ

ଚାଲିବି ତୁମରି ସାଥେ

ପିଇ ଯାଉଥିବି ପ୍ରେମର ପୀୟୁଷ

ହାତ ରଖି ତୁମ ହାତେ I