ସମ୍ପର୍କ ନିଆରା
ସମ୍ପର୍କ ନିଆରା
ତା ସାଥେ ପ୍ରଥମ ଦେଖା
ତାଙ୍କ ଗାଆଁ ଦେଉଳରେ
ସିଏ ଜାଳୁଥିଲା ଦୀପ
ମୁଁ ଲେଖୁଥିଲି ଗପ
ତାକୁ ଚାହିଁ ତାର ସେହି
ଦୀପଶିଖା ଆଲୁଅରେ ....
ଆଖି ବୁଜି କହୁଥିଲା
ମନ କଥା ଦିଅଁଙ୍କୁ
ଅପଲକେ ଦେଖୁଥିଲି
ତା ସୁନ୍ଦର ମୁହଁକୁ
ସେଇଠୁ ଆରମ୍ଭ ଆମ
ମନ ଦିଆନିଆ ପ୍ରେମ
ମନ ଦୋଳି ଝୁଲିଝୁଲି
ବରଗଛ ଓହଳରେ....
ଅଙ୍କାବଙ୍କା ବାଟ କେତେ
ଯାଇ ନାହୁଁ ଥକିରେ
ସମୟ ତରାଟେ ଆଖି
ପାରେ ନାହିଁ ରୋକିରେ
ଚାଲୁଛୁ ତ ଚାଲୁଥିବୁ
ଝୁଣ୍ଟିପଡି ଉଠୁଥିବୁ
ଆଙ୍କିଆଙ୍କି ନୂଆ ଛବି
ପ୍ରୀତି ରଙ୍ଗ ବହଳରେ..
ପ୍ରିୟା ଆଜି ପ୍ରିୟ ପତ୍ନୀ
ସମ୍ପର୍କ ନିଆରା
ବୟସର ଅପରାହ୍ନେ
ସେ ଏକା ସାହାରା
ଡର ଲାଗେ ଏକା ଏକା
ଦୁକୁଦୁକୁ ଦୀପଶିଖା
ସିଏ ମୋ ଦିଗବାରେଣୀ
ସମୟର ଅଥଳ ଜଳରେ...