ଶୂନ୍ୟ ଲାଗେ ତୁମ ବିନା

ମାଖିଅଛି ଯଦି     ଦେହରେ ହଳଦୀ

ତୁମ ପ୍ରୀତି ହେତୁ ସାଥି

ଶରଧାରେ ଲାଗେ   ପ୍ରେମ ଅନୁରାଗେ

ହାତେ ମୋର ମଞ୍ଜୁଆତି ।

ପ୍ରତି ସକାଳରେ    ଶୋହଇ ଭାଲରେ

ଏ' ଯେଉଁ ସିନ୍ଦୂର ବିନ୍ଦୁ

ତୁମରି ଆଗ୍ରହେ  ମୋ' ଶିରାରେ ବହେ

ଉତ୍ତାଳ ପ୍ରଣୟ-ସିନ୍ଧୁ ।

କୌଳିକ ପ୍ରଥାରେ    ଚଢ଼ାଇ ମଥାରେ

ଓଢଣୀ ତୁମର ନାମେ

ନିଜ ପରିଚୟ       କରିଛି ବିଲୟ

ଆଭୂଷିତ ସରଞ୍ଜାମେ ।

ମୋର ଏହି ବେକ   ତୁମ ନାମେ ଦେଖ

ପିନ୍ଧିଛି ମଙ୍ଗଳସୂତ୍ର

ରକ୍ତ କ୍ଷୀର ଗର୍ଭ     ସମର୍ପି ମୋ' ସର୍ବ

ଜନ୍ମାଇଛି ତୁମ ପୁତ୍ର ।

ତୁମ ନାମେ ଶଙ୍ଖା    ପିନ୍ଧିବାରେ ଶଙ୍କା

ରଖିନାହିଁ କେବେ ତିଳେ

ଗୁରୁଭକ୍ତି ଶ୍ରଦ୍ଧା    କରେ ବୋଲି ସଦା

'ସୁହାଗିନୀ' ବର ମିଳେ ।

ତୁମ ଇଷ୍ଟ ଗୋତ୍ର    ଆପଣାଇ ସ୍ତୋତ୍ର

ଉଚ୍ଚାରଣ କରେ ନିତି

ତୁମ ଋଦ୍ଧି ସିଦ୍ଧି       ପାଇଁ ପୂଜାବିଧି

କରି କାଳ ଯାଏ ବିତି ।

ତୁମ ବସାଘର       ସଜାଇ ଜାଗର

ରହେ ଦିନରାତି ସିନା

ସର୍ବସ୍ବ ମୋ' ତେଜି    ପାରିଲିଣି ହେଜି

ଶୂନ୍ୟ ଲାଗେ ତୁମ ବିନା ।